Un seminario abordará os retos da computación na nube no ámbito empresarial

A Axencia para a Modernización Tecnolóxica de Galicia (AMTEGA) celebra mañá en horario de 16:00 a 20:00 horas no Centro Demostrador TIC o seminario Retos na adopción do Cloud Computing dirixido a profesionais do sector TIC. A asistencia ao seminario é de balde, condicionada ao aforo da sala e previa inscrición en liña.
Na xornada analizaranse os retos que determinarán a evolución e a definitiva implantación do Cloud Computing no contexto nacional e internacional. Así, os CIO, CISO, CTO e directores TIC de empresas coñecerán as claves para minimizar os riscos nas organizacións que desexan apoiarse en servizos Cloud ou aquelas que desexan migrar á nube, as solucións e servizos TIC que ofertan a terceiros.

O seminario será impartido por Roberto Baratta, CISO e responsable de Seguridade das Tecnoloxías da Información en NovaGaliciaBanco, membro da Asociación Española para o Fomento da Seguridade da Información (ISMS Fórum), da Cloud Software Alliance (CSA) e colaborador da versión española da Guía de Seguridade de Áreas Críticas en Cloud Computing v3 da CSA. A súa traxectoria foi recoñecida recentemente co Premio ao CISO do Ano 2012 da Fundación Dintel e o premio a Traxectoria Profesional 2013 do Colexio Profesional de Enxeñería Informática de Galicia (CPEIG).