Os responsables de Granxafamiliar.com presentan a segunda entrega do seu curso en liña de mercadotecnia rural

O proxecto Granxafamiliar.com, iniciativa pioneira e referencial de desenvolvemento rural a través do emprego das redes como canles de comunicación e venda de produtos agro-gandeiros, segue a estender as súas pólas formativas. Así nolo confirma o grupo Gist Idega da Universidade de Santiago, responsable da posta en marcha da dita iniciativa, que como lembraremos acubilla dúas ducias de explotacións galegas do rural, achegando os seus produtos de indubidable calidade aos mercados urbanos da nosa terra e de todo o territorio estatal. Pois ben, segundo confirma o dito grupo xa está en marcha a segunda edición do curso en liña para innovar en mercadotecnia rural. A actividade (Innovación e marketing rural) bebe das fontes dos sete anos de traxectoria de granxafamiliar.com.
Segundo inciden os seus responsables, o curso en liña amosa a necesidade de cualificar recursos humanos en marketing territorial, emprendemento, xestión de recursos dixitais e de redes sociais, agricultura ecolóxica, turismo creativo ou desintermediación comercial, orientados especificamente cara o medio rural. Para o director do curso, o profesor Carlos Ferrás, está claro que na actualidade non abonda “con saber producir, senón que cómpre saber vender os produtos do rural”. De aí que sexan os mesmos produtores os que máis precisan adquirir coñecementos axeitados para as necesidades do eido dixital, e elas/eles son polo tanto os que demandan estes coñecementos.
O curso en cuestión abrangue máis de 60 horas de duración e esténdese do 20 de xaneiro ao 20 de febreiro. Ao seu abeiro, analizaranse metodoloxías, aplicacións TIC e experiencias de emprendemento para a innovación e desenvolvemento do medio rural e da agricultura familiar, co obxecto de que o alumnado poida desenvolver os seus propios proxectos aplicados. Ademais, os participantes familiarizaranse co funcionamento e posibilidades dos sistemas en liña de xestión de información a través das plataformas www.granxafamiliar.com e www.galiciaautentica.org. A inscrición debe facerse on line.