A Deputación de Lugo organiza este trimestre un amplo programa de actividades TIC para os nosos maiores

Boa parte das nosas persoas maiores non só teñen interese nas novas tecnoloxías, senón que tamén amosan inclinación por empregalas a fondo. Unicamente hai que procurar e achar as cuestións que lles axuden a entender a Sociedade do Coñecemento en toda a súa dimensión: o elemento familiar de utilidade que achegue luz sobre o todo. Así o entende a Deputación de Lugo, que anunciou a posta en marcha da programación dirixida ós maiores do INLugo para o primeiro trimestre do ano e que comezou co curso Coñece o teu ordenador. No inicio de actividades participou o deputado de Cooperación e Asistencia ós Concellos, Álvaro Santos Ramos. No ciclo que abre o programa están inscritos unha ducia de maiores que reciben xa nocións básicas para axudalos a enfrontarse a un computador e sacarlle ó máximo partido.
O obxectivo destes cursos, informa a Deputación, é que os maiores lles perdan o medo ás TIC, polo que “todos son eminentemente prácticos”. No que comezou este luns, Coñece o teu ordenador, os participantes manexaron o seu equipo informático dende o primeiro intre para adquirir logo soltura a través de “exercicios e xogos sinxelos”. O curso servirá para animar ós maiores a que empreguen o ordenador na súa vida diaria, mellorando as súas comunicacións e aumentando a súa autonomía, engade o órgano provincial.
Informar tamén que este martes 14 de xaneiro, de 16:30 a 18:30 horas, celébrase un obradoiro de estimulación cognitiva coa Wii. Segundo explican fontes da Deputación, de usarmos os xogos axeitados, a videoconsola resulta “unha excelente ferramenta para traballar capacidades como a memoria, a percepción, a análise, o cálculo e a agudeza”. E engádese: “Os maiores que participan neste obradoiro aprenden a manexar as novas tecnoloxías, ao tempo que se divirten xogando”. A entidade provincial convocou tres obradoiros con Wii e un con Xbox, dous son de estimulación cognitiva e outros dous de estimulación motriz e funcional.
As actividades programadas polo INLugo para o primeiro trimestre do ano inclúen 25 cursos e obradoiros TIC dirixidos a maiores. Ofértanse un total de 312 prazas en accións formativas de variada duración e temática coas que os participantes aprenderán a manexar o seu ordenador, tablet, teléfono móbil ou videoconsola. Segundo os docentes que participan, estes cursos tamén fomentan a sociabilidade dos maiores, xa que relaciónanse con outros alumnos e melloran as súas comunicacións con familiares e amigos a través de Internet. As actividades son completamente gratuítas e para apuntarse ou consultar a programación completa só teñen que entrar na web da Deputación.