Forte incremento da venda de comics para iPad

Aínda que normalmente cando falamos de boas vendas de contidos dixitais a través de dispositivos de Apple estamos a falar de música, non é a única liña de produtos que parece estar a trunfan en formato dixital, e The Hollywood Reporter está a dar conta de que a aplicación para iOS de comiXology (tenda dixital de comics) conseguiu ser a aplicación distinta dun xogo con máis ingresos no iPad por terceiro ano consecutivo.
O director xeral e co fundador de comiXology, David Steinberger, declarou que “nun mercado de mil millóns de dólares no que compiten máis dun millón de aplicacións é gratificante cualificar como a aplicación distinta dun xogo para iPad de maior facturación en toda a App Store”, engadindo que 2013 foi un grande ano para a compañía, no que conseguiu vender máis de 6.000 millóns de páxinas de material, triplicando os datos do ano anterior.
Cómpre detallar que comiXology non só vende a través da súa aplicación para iOS, senón que tamén é a compañía detrás das tendas oficiais de Marvel Entertainment e DC Entertainment, as principais editoras de comics nos EE.UU.
comiXology tamén conta con aplicacións para Android e para Windows 8, así como versión web, e esta tenda de contidos en formato dixital evolucionou enormemente nos últimos anos, de xeito que agora xa non hai que agardar meses para poder gozar das novidades a través desta plataforma, senón que a meirande parte das obras estréanse simultaneamente en papel e dixital, e as obras dixitais tamén son susceptibles de ofertas e promocións, o que está a conseguir que cada vez conten cunha maior aceptación do público (ao que tamén axuda que non haxa que acudir a unha tenda especializada para poder facerse coas novidades, superando así as limitacións propias da distribución física dun produto de nicho).