Chega Videoguard, sistema de videovixilancia intelixente contra o furtivismo

O furtivismo no noso litoral pódese combater con innovación e novas tecnoloxías. Así nolo veñen de lembrar os responsables dun proxecto galego, o Proxecto Videoguard, que consiste nun sistema de videovixilancia intelixente para a prevención e persecución da pesca e do marisqueo ilegal. Este recurso, do que falamos no anterior número en papel de Código Cero na nosa entrevista co director de Retegal (un dos centros responsables do sistema), vaise pór en marcha este semestre en dous concellos galegos a xeito de experiencia piloto. Segundo informa a Xunta, que coordina e impulsa esta iniciativa, o período de probas estenderase ata finais de ano e serviralle “para valorar a viabilidade de implantar o sistema na costa galega, aproveitando as infraestruturas de telecomunicacións xestionadas polo operador público Retegal, dependente da Axencia para a Modernización Tecnolóxica de Galicia (AMTEGA)”.
Segundo nos lembra a Axencia, o proxecto Videoguard está desenvolvido por un consorcio de empresas tecnolóxicas integrado por Coremain, Bastet Enxeñaría, TRC, Retegal, e coa participación do Centro Tecnolóxico Gradiant, cun investimento de 1,8 millóns de euros, financiados con fondos do programa Innterconecta a través da Consellería de Economía e Industria e o CDTI. Estes detalles e o alcance do proxecto foron expostos este martes 4 de febreiro perante os medios de comunicación pola conselleira de Medio Rural e Mar, Rosa Quintana, a directora da AMTEGA, Mar Pereira, o director xerente de Retegal, Jose Ángel Abeal, e o director da Axencia Galega de Innovación, Manuel Varela. A presentación do proxecto desenvolveuse no porto de Vilagarcía. No acto participaron tamén os representantes da consorcio empresarial. Alí fíxose saber que “o sistema permitirá detectar embarcacións en zonas de porto e rías, así como persoas en zonas de praia, rochas e bateas en horario de día ou nocturno”. A plataforma de Videoguard está deseñada para dous posibles emprazamentos. Por unha banda, un escenario de curta distancia con estacións de videovixilancia situadas a menos de medio quilómetro das embarcacións ou persoas a monitorizar; e por outra banda un escenario experimental a unha distancia de entre 5 e 10 quilómetros da costa para o que se empregarán as torres de telecomunicacións de Retegal. Nos dous casos, o sistema grava as imaxes da zona vixiada, analiza a información procedente das gravacións e ante a detección dunha posible infracción traslada a alarma ao centro de control e dispositivos móbiles en tempo real. O sistema almacena a información permitindo a consulta e recuperación das imaxes gravadas, informaron os responsables do desenvolvemento.
Ademais, o proxecto “garante o respecto á privacidade requirida pola LOPD no seguimento e procesado de vídeo en espazos públicos, empregando técnicas de ocultación selectiva daqueles patróns visuais que puidesen permitir a identificación de persoas e embarcacións nas gravacións”. De feito, o persoal de vixilancia poderá constatar que unha persoa ou embarcación está a cometer unha infracción pero sen poder recoñecela de forma inmediata.