A USC inaugura unha emisora de radio en liña

Esta mañá no Auditorio da Facultade de Ciencias da Comunicación da Universidade de Santiago de Compostela, co gallo do Día Mundial da Radio, inaugurouse oficialmente a Radio campUSCulturae on line, nun acto presidido polo reitor Juan Casares e no que participaron o decano da Facultade, Xosé Pereira Fariña e os coordinadores desta primeira emisora da USC, Irene García García, Xosé A. Neira Cruz e Toni España Faqué. Na parte do público estaba presentes uns catrocentos escolares procedentes de 11 centros de ensino que resultaron finalistas do I Certame de Radio Escolar campUSCulturae.
A nova canle de radio, que emitirá a diario unha programación realizada por estudantes, profesores e persoal non docente da USC, así como por centros de ensino non universitario, colectivos de inmigrantes, asociacións e internos dos centros de penitenciaría de A Lama (Pontevedra) e Teixeiro (A Coruña), incorporará en próximas datas contidos doutras canles radiofónicas universitarias.
A nova radio comezará as súas emisións cunha grella de programación composta por 10 propostas iniciais: Metrópoles delirantes, primeiro programa radiofónico sobre banda deseñada existente en Galicia, presentado pola locutora Nieves Rodríguez e que xa leva un par de entregas que poden seguirse a través do seu podcast; ¿Claro para todos?, programa sobre lecer universitario; Neurovit, programa sobre música electrónica e ciencia; 94 voces, espazo dedicado á información de actualidade; a axenda cultural Zona O; o programa Voz crítica, de reportaxes informativas de actualidade; Generación 9.0, programa sobre a cultura e as tendencias dos 90; Al detalle, programa de monográficos temáticos; o programa infantil Abracadrabra; e Todas as mañás do mundo, espazo de viaxes por linguas, países e culturas.