BBVA adquire unha empresa especializada en tarxetas bancarias xestionadas a través da web e o móbil

O grupo de banda español BBVA anunciou hoxe o peche da compra da compañía estadounidense Simple por 117 millóns de dólares dentro dunha estratexia para liderar os cambios tecnolóxicos que están a transformar a industria financeira. O presidente do BBVA, Francisco González, declarou que “Simple reforzará a nosa transformación dixital global e ao mesmo tempo BBVA proverá a Simple dos medios para maximizar o seu enorme potencial de crecemento”.
Simple, con sede en Portland (Oregón, Estados Unidos), fundouse en 2009 e iniciou a súa andaina comercial en xullo de 2012. Ten agora máis de 100.000 clientes en todo o EE.UU., cinco veces os usuarios que tiña a finais de 2012, e ofrece aos seus clientes todo o que necesitan para gastar do xeito máis intelixente e aforrar máis. Os clientes dispoñen dunha tarxeta Visa Simple, así como aplicacións avanzadas para Android e iOS, que inclúen ferramentas de aforro e un servizo ao cliente diferencial.
Simple seguirá operando baixo a mesma marca, coa mesma filosofía e o mesmo enfoque de experiencia de cliente. Joshua Reich, co fundador e CEO, xunto a Shamir Karkal, co fundador e director financeiro, continuarán ao mando da organización, formada por 92 empregados. BBVA pechará a compra a través da súa filial en Estados Unidos, BBVA Compass Bancshares, Inc., que no futuro axudará a Simple a desenvolver novos produtos e servizos. Co respaldo do Grupo BBVA, Simple poderá expandirse máis aló de Estados Unidos e entrar en novos mercados.

Vídeo promocional de Simple