Facebook vai mudar o funcionamento dos enderezos de e-mail baixo o seu dominio

Facebook leva tempo facilitando que os seus usuarios poidan gozar de enderezos de correo electrónico baixo o dominio facebook.com, que se integran no servizo de mensaxería da plataforma, como un xeito de aglutinar distintas comunicacións persoais baixo o seu ecosistema, o que parece non ter convencido ao público e, en vista de que o e-mail de Facebook estaba a ser infrautilizado decidiron suspendelo.
Pero a ponte que traduce as mensaxes a enderezos @facebook.com en mensaxes dentro de Facebook non dirá adeus bruscamente, senón que converterase nunha redirección de e-mail, de xeito que cando escribamos a ese tipo de enderezos, as mensaxes remitiranse automaticamente ao correo electrónico principal do usuario, pasando antes polos debidos filtros para evitar que esta solución se converta nunha grande fonte de correo lixo (actualmente o sistema xa conta con numerosas restricións para tal fin, limitando ao máximo a recepción de mensaxes de persoas coas que non teñamos relación dentro de Facebook).
Este cambio de funcionamento do servizo de correo electrónico de Facebook aplicarase nas vindeiras semanas, e os usuarios poderán ter control sobre o mesmo, sendo posible a súa desactivación.