A Deputación de Pontevedra pon en marcha a web do Congreso Internacional Camellia 2014

A Deputación de Pontevedra organiza o Congreso Internacional Camellia 2014, que se celebrará en Pontevedra do 11 ao 15 de marzo. Como soporte informativo ao Congreso, o servizo de Novas Tecnoloxías do organismo provincial desenvolveu a web www.camellia2014.depo.es co obxectivo de difundir información de interese de todo o relacionado co devandito congreso á cidadanía en xeral. Entre outras funcionalidades, a web Camellia 2014 brinda a posibilidade de realizar a inscrición para participar no congreso aos membros da Sociedade Internacional da Camelia, aos investigadores, técnicos, profesionais e afeccionados relacionados con calquera aspecto do mundo da camelia. Ademais, desde a web infórmase de todas as visitas organizadas que os participantes poderán realizar aos xardíns e pazos vinculados á presenza da camelia, do 6 ao 10 de marzo en Porto e norte de Portugal, e as visitas posteriores ao Congreso, do 16 ao 22 de marzo en Galicia.
Estrutura dos contidos do portal web
O contido publicado no portal web está estruturado segundo a súa natureza e en relación ás principais actividades que se realizarán no evento. Segundo informa a Deputación, a web do Congreso Internacional Camellia 2014 centra os contidos fundamentalmente en catro apartados principais: os distintos comités que conforman o congreso, o programa completo do mesmo, as sesións científicas incluídas e as visitas polos diferentes xardíns e pazos. A maiores, e tendo en conta o importante interese a nivel internacional que esperta o congreso e a presenza de asistentes de diferentes países do mundo, saliéntanse datos relacionados coa localización, tanto da sede onde se efectuará o evento como a localización dos hoteis onde os inscritos poderán aloxarse.
A web do Congreso Internacional Camellia 2014? estrutúrase nos seguintes apartados principais:
· Información do congreso: apartado de inicio onde se detallan as datas do Congreso Internacional xunto con tres seccións destacadas:
-Programa completo do congreso
-Formularios de inscrición, tanto para a asistencia unicamente ás sesións científicas como para todos os eventos asociados ao congreso incluíndo as visitas aos distintos xardíns.
-Formularios de contacto segundo a natureza da información solicitada, para asistir aos congresos ou para as sesións científicas.
· Localización: pola natureza do Congreso, ao ser de índole internacional, definiuse un apartado coa localización, tanto da sede do evento como dos hoteis que se propoñen para a estancia dos asistentes ás diferentes visitas programadas. Esta información inclúe indicacións de como chegar a Pontevedra desde as principais cidades de Galicia, e información de interese dos medios de transporte público como é o caso dos aeroportos, paradas de trens e estación de autobús.
Para a localización dos puntos de interese integrouse o portal web con ferramentas Google, en concreto con Google Maps, e xeolocalizáronse mediante coordenadas GPS os hoteis e a sede do congreso cunha iconografía personalizada que diferencia os distintos puntos.
· Congreso: neste apartado detállase toda a información relacionada co Congreso, desde a estrutura dos comités, pasando pola definición das xornadas que se inclúen no mesmo ata toda a información relacionada coa parte científica do evento. Para iso, estrutúrase a información en diferentes apartados:
-Comités: información e organigrama dos dous comités existentes: Comité de Honra e Comité Organizador.
-Inscrición: ofrece a posibilidade de inscribirse ao Congreso a través da web, sempre como unha opción máis aos medios convencionais de fax e correo ordinario. Segundo as opcións que se ofrecen no evento, permitirase a inscrición unicamente ás sesións científicas ou a inscrición completa, tanto ás mencionadas sesións como ás visitas organizadas antes, durante e despois da celebración do Congreso. O proceso de inscrición pódese realizar a través do cumprimentado dun formulario en formato PDF ou dun formulario web. Cómpre sinalar que nos formularios web de todo o portal, optouse por engadir un código captcha para evitar na medida do posible correos masivos.
-Precongreso, congreso e postcongreso: definíronse tres apartados con estrutura semellante para coñecer o programa detallado de cada un dos días que compoñen o evento. A información repártese en tres apartados, precongreso, congreso e postcongreso, e en cada un destas seccións habilítase a posibilidade de descargar individualmente o programa.
-Sesiones científicas: para a transferencia e intercambio de resultados de investigacións e traballos realizados que se exporán no Congreso, habilitouse un apartado con toda a información precisa desde as datas límites, as instrucións e exemplos de como realizar os traballos ata a información de contacto e o comité científico que valorará devanditos traballos.
· Visitas: outra información de interese para os asistentes ao Congreso é aquela de carácter turístico relacionado co mundo das camelias. Para difundir esta información, no portal habilitouse un apartado con tres seccións relacionadas coas visitas que se realizarán durante o precongreso, o congreso e o postcongreso. Para a localización das rutas diferentes rutas dispoñibles habilitouse un mapa interactivo, no que se xeolocaliza cada unha delas mediante as coordenadas GPS e amósase unha listaxe que permite acceder á información detallada das mesmas.
· Outros contidos da web: ademais de toda a información descrita nos anteriores puntos, o portal web conta cunha sección de noticias relacionadas co Congreso e unha sección multimedia, ofrecendo a posibilidade de integrar contido multimedia desde a canle de Youtube de Turismo Rías Baixas da Deputación de Pontevedra ou desde o propio xestor de contidos de Liferay. Por último, habilitouse unha sección de ligazóns con todas as entidades colaboradoras no evento.
Contido en varios idiomas
Dado o carácter internacional do Congreso era importante que o contido da web estivese en varios idiomas para achegar a información do evento a un maior número de interesados. Por este motivo desenvolveuse o portal web en castelán, en galego e en inglés.
Accesibilidade no portal web
Nun portal web de carácter internacional é de vital importancia a utilización dunha tecnoloxía que garanta que a información poida ser consultada por calquera público. Por este motivo o portal web foi deseñado para cumprir o estándar de accesibilidade AA. Este estándar, definido por World Wide Web Consortium (W3C), comunidade internacional dedicada ao desenvolvemento de estándares, está orientado a garantir que os contidos dos portais web publicados en Internet sigan as pautas marcadas por eles.
En definitiva, o estándar AA permite que todos os usuarios poidan acceder en condicións de igualdade aos contidos do portal web.
Plataforma tecnolóxica
O portal web do Congreso Internacional da Camellia desenvólvese na plataforma de portais web da Deputación de Pontevedra baseada nunha solución de software libre Liferay versión 6.1.1 GA2. A utilización desta ferramenta tecnolóxica garante un mantemento áxil dos contidos incluídos na web, así como favorecer a realización de calquera modificación de maneira sinxela.
Entre as principais características deste xestor de portais cómpre salientar:
· Esta plataforma é compatible coa maioría dos servidores de aplicacións e base de datos existentes no mercado.
· Inclúe un sistema de xestión de contidos (CMS) cun fluxo de aprobación dos devanditos contidos, seguridade integrada na propia plataforma e a posibilidade de personalizar as páxinas para diferentes usuarios definindo os seus roles e os diferentes permisos.
A versión de Liferay 6.1.1, ademais de solucionar os erros da súa versión anterior 6.0 GA 4, ofrece unha serie de novas funcionalidades que a continuación se destacan as máis relevantes:
· Mellora na interface de usuario en canto á súa usabilidade e á remodelación da biblioteca de documentos.
· Mellorouse o asistente de configuración para axilizar a primeira instalación dun portal web.
· Introduciuse a posibilidade de despregamento en quente de aplicacións.
· Avances para os dispositivos móbiles de maneira que se poidan configurar un conxunto de regras que adapten o comportamento do portal en función do dispositivo utilizado.
· Melloras nos Servizos Web JSON para facilitar o acceso aos servizos que ofrece a plataforma Liferay mediante a súa API.
· Evolución na xestión de contidos web con novas funcionalidades e usabilidade, por exemplo a edición de estruturas mediante drag-and-drop.
· Melloras no rendemento e precisión das procuras.
· Repositorios de almacenamento mediante o emprego do protocolo estándar CMIS.
· Xestión unificada de usuarios utilizando un directorio central para xestionar os usuarios e as organizacións de forma xerárquica.
· Novas funcionalidades de colaboración e construción de redes sociais corporativas que se adaptan ás necesidades actuais que ofrece Internet de intercambio e divulgación de contido.
Desde Novas Tecnoloxías da Deputación de Pontevedra está a realizarse a migración de todos os seus portais web a esta versión de Liferay 6.1.1 GA2.
Ademais da plataforma Liferay, estase en proceso de integración de tódolos portais web da Deputación co sistema de locución Readspeaker. Este sistema permite a reprodución de audio do contido da web, controlable completamente desde o teclado. O reprodutor está desenvolvido de acordo coas últimas normas (HTML5/CSS3) sen a utilización de tecnoloxía Flash, conseguindo un deseño e funcionalidade máis sinxelos, é compatible con todos os dispositivos e navegadores do mercado e é completamente accesible cumprindo o nivel AA. O obxectivo desta ferramenta é mellorar a accesibilidade á información publicada nas webs a todas aquelas persoas con certas dificultades visuais.
En concreto, no portal web do Congreso Internacional da Camellia integrouse Readspeaker para ofrecer a posibilidade da lectura do apartado de noticias nos idiomas galego e castelán.
A implantación deste portal, xunto coa cantidade e variedade de información publicada e os recursos tecnolóxicos aplicados no seu desenvolvemento, logran achegar ao interesado para realizar unha completa divulgación das actividades que se van a desenvolver no Congreso Internacional da Camellia 2014 en Pontevedra.