As redes sociais actuais vistas como reinos de Juego de Tronos

Hootsuite, a plataforma que facilita a xestión de redes sociais en Twitter, Facebook, LinkedIn, Google+, Foursquare e Mixi, está a aproveitar o retorno á pequena pantalla da serie Juego de Tronos para publicar un vídeo no que homenaxean a súa cabeceira substituíndo as distintas casas que se enfrontan nesta épica historia por redes sociais, como xa fixeran nunha completa infografía o ano pasado, na que colocaban a Google+, YouTube, Twitter, Facebook, Tumblr, LinkedIn, Pinterest, Instagram, Vine, TweetDeck e a propia Hootsuite no mapa dos reinos das redes sociais, explicando as relacións que existen ante as distintas casas.
No vídeo que homenaxea a serie da HBO podemos ver dende o coliseo de Facebook (con WhatsApp e Instagram no seu contorno) e os dominios de Google, o mercado de LinkedIn, pasando polos paxariños de Twitter, e sen esquecer a SnapChat, no que podemos considerar como un curioso retrato do cambiante mundo das redes sociais.

Vídeo co que Hootsuite homenaxea o retorno de Juego de Tronos

Accidentada estrea da serie nos EE.UU.

Como xa aconteceu co episodio final de True Detective, a estrea a pasada noite do primeiro episodio da nova tempada de Game of Thrones saldouse cun balance negativo para o servizo HBO Go, que volveu caer, deixando aos seus subscritores sen a posibilidade de recibir a serie á vez que os usuarios que ven a televisión a través de receptores tradicionais, deixando en evidencia a un servizo que debería ter tomado medidas para non repetir este tipo de incidencia.