Telefónica distribuirá enerxía eléctrica entre os seus grandes clientes

Telefónica non cesa de abrir frontes. E a máis recente ten relación directa cun ámbito que está a arredarse do inmobilismo imposto durante anos polas grandes corporacións: o ámbito da enerxía eléctrica (que arestora busca o seu camiño cara a novos actores e novos xeitos de produción, máis eficientes e renovables). A operadora é polo tanto un novo actor a ter e en conta, malia que nun principio só será distribuidora e semella que unicamente lles venderá enerxía aos seus grandes clientes (amais de cubrir as súas propias necesidades). A medida será materializada pola filial Telefónica Solucións de Informática e Comunicacións.
Basicamente, do que se trata é fornecer un máis amplo servizo aos seus grandes consumidores, que teñen gastos de enerxía moi altos por mor da súa produción, do seu meirande número de instalacións e tamén por mor do espallamento destas instalacións. Até o de agora, Telefónica ofrecíalles servizos como a xestión a distancia de infraestruturas, pero a idea é ir máis alá no camiño da eficiencia e a rendibilidade, subministrando tamén enerxía nas infraestruturas dos seus clientes. Deste xeito, a operadora ten previsto mercar subministro a terceiros para venderlla aos usuarios dos seus servizos, e todo co obxectivo de proporcionar unha solución completa de xestión da enerxía que maximice as eficiencias xeradas polas grandes empresas. A dúbida está polo de agora en se Telefónica ampliará ou non este servizo ao resto de usuarios potenciais, usuarios residenciais.