O concurso de webseries da CRTVG xa ten gañador e finalistas

Hai dous anos a CRTVG (Compañía de Radio/Televisión de Galicia ) poñía en marcha un proxecto chamado Labovisión de Galicia, un laboratorio de innovación audiovisual que nacía co obxectivo de promover e apoiar o talento do noso país, encamiñado á procura e ao desenvolvemento de novas tendencias audiovisuais. Como consecuencia disto, botaba a andar un concurso de webseries da CRTVG denominado I Concurso de Webseries da CRTVG Historias do Camiño, unha convocatoria relacionada co fenómeno Xacobeo, que se pechaba coa presentación dun total de 17 traballos, dos que resultaba gañador Xogo de heroes, de Roberto Conde
Trátase dunha “historia épica ao longo do Camiño de Santiago, con seis grandes heroes de Galicia como protagonistas”, segundo palabras do seu autor. Asemade, resultaban finalistas os proxectos Tres pitos e un capón e Imos aviados. Os autores dos tres traballos seleccionados terán a posibilidade de perfeccionar as súas ideas nun obradoiro impartido por profesionais de recoñecido prestixio. A CRTVG comprométese a mercar os dereitos de propiedade intelectual do episodio piloto do gañador para exhibilo na súa web.
O xurado final, integrado por: Paula Hernández, directora de enawebseriada.com; Jorge Casinello, director de Entre pipas; Sebastián Talavera, profesor da Facultade de Comunicación da Universidade de Sevilla e realizador de autopromocións de Canal Sur Televisión; Esther Medina, xefa da Área de Innovación e Novas Canles da CRTVG, e Ignacio Varela, coordinador do concurso, decidían por unanimidade de acordo cos contidos e criterios establecidos nas bases do concurso declarar gañador ao proxecto Xogo de heroes. Neste senso, o xurado salientou “a alta calidade dos proxectos e a dificultade que supuxo decantarse por un deles. Do mesmo xeito, quedou patente a idoneidade de que todos fosen finalmente levados a cabo”.