Conecta PEME dá acubillo xa a 200 empresas impulsando iniciativas innovadoras

Xa temos segunda convocatoria de Conecta PEME, unha iniciativa da Consellería de Economía dirixida a permitir que máis de 200 pequenas e medianas empresas galegas participen en proxectos innovadores que mobilizan máis de 40 millóns de euros na nosa terra. Así nolo fixo saber este venres o director da Axencia Galega de Innovación, Manuel Varela Rey, quen nunha cita cos medios salientou “a boa acollida dun programa que só en medio ano ten resolto dúas convocatorias fomentando proxectos de colaboración entre 3 e 6 empresas e a participación de polo menos un centro tecnolóxico ou de investigación”.
Segundo engadiu, esta segunda convocatoria significará un importante pulo para dúas ducias de novos proxectos nos que participan 104 empresas e 12 centros de I+D, mobilizando máis de 17 millóns de euros. A un nivel xeral, abranguendo as dúas convocatorias no seu conxunto, Varela Rey dixo que están a xerar preto de 500 postos de traballo na Comunidade, “configurándose ao mesmo tempo como a mellor vía para o acceso á innovación do tecido empresarial galego, composto nunha gran parte por pequenas e medianas empresas”. Ao fío disto, lembrou que preto do 80% das empresas participantes na segunda convocatoria son pequenas.
Salientou tamén que o programa insírese na Estratexia de Especialización Intelixente de Galicia – RIS3, a folla de ruta da innovación en Galicia nos vindeiros anos. Esta estratexia, lembrou, abrangue 3 retos: un novo modelo de xestión de recursos naturais e culturais baseado na innovación, un novo modelo industrial sustentado na competitividade e o coñecemento; e un novo modelo de vida saudable cimentado no desenvolvemento tecnolóxico. Segundo engadiu Varela Rey, Conecta PEME complementa ao programa Innterconecta no traballo que está a desempeñar a Xunta a prol dunha innovación aberta. “Entre ambas actuacións”,explicou, “estanse a mobilizar máis de 240 millóns de euros en proxectos innovadores que contribúen a mellora competitiva do tecido empresarial ao sumar, ambos programas, máis de 500 empresas beneficiadas”.