A tecnoloxía que nos permite poñernos na pel dos deportistas, finalista no concurso internacional de Intel

Intel xa ten finalistas do seu reto Make It Wearable (algo así como Faino Posible). Neles atópase a iniciativa catalá First V1sion, un novo sistema de retransmisión deportiva que posibilita a aparición do punto de vista do xogador en todo tipo de deportes. Esta proposta, acelerada por Wayra Barcelona (Telefónica), foi seleccionada o pasado 29 de agosto para engrosar a devandita listaxe do certame de Intel, un dos concursos de meirande renome no eido internacional das novas tecnoloxías. First V1sion permítenos ver o que ven os deportistas, ao integrar o seu sistema de transmisión na camiseta dos mesmos. Trátase dunha innovadora achega de visión subxectiva. Os seus desenvolvedores sinalan que o xogador apenas é quen de sentir o equipamento que carreta mentres retransmite.
Volvendo ao reto Make It Wearable, Intel salienta que este ano acadouse novamente unha incrible presenza de empresas europeas: máis da metade dos grupos participantes. O primeiro premio será de 500.000 dólares. Para a multinacional, os dez finalistas (entre os que se atopa a empresa catalá devandita) están a levar o máis lonxe posible “os límites da innovación”, cunha serie de conceptos do máis variado que van dende unha cámara voadora a proxectos de robótica de vangarda. Os gañadores serán anunciados o 3 de novembro en Nova York. As apostas de Intel valoran positivamente as achegas procedentes de Alemaña, Polonia, España e Reino Unido.
A continuación, damos conta das iniciativas europeas que máis destaca a compañía.
· BabyBe (Alemaña). Trátase dun colchón biónico que mantén a mamás e bebés conectados durante o período de incubación artificial, transmitindo información táctil desde a nai ao cativo en tempo real, reducindo así a tensión na contorna artificial da incubadora e proporcionando á nai un papel activo no coidado do seu fillo prematuro.
· ProGlove Concept (Alemaña). É unha ferramenta de produción para levar posta e baseada nun sensor avanzado. O seu obxectivo é axudar aos usuarios profesionais dentro dunha contorna de produción a gran escala para realizar as súas tarefas de forma máis ergonómica e eficiente, mediante a combinación de múltiples instrumentos nunha luva, optimizando o proceso de produción e aforrando custos.
· First V1sion (España). First V1sion ofrece o punto de vista dos xogadores, mediante a integración dunha cámara e dun sistema de transmisión nunha camiseta optimizada para deportes. Desta maneira, podemos ver o que ven os xogadores onde antes non era posible: en baloncesto, fútbol, tenis, etc.
· Open Bionics (Reino Unido). Iniciativa para crear unhas mans protésicas robotizadas e de baixo custo. Cos avances en materiais e en impresión 3D, o seguinte paso será a elaboración dunha man de menos de $100 para países en desenvolvemento de todo o mundo.
· Snowcookie (Polonia). Trátase dunha plataforma electrónica persoal que, combinada cun smartphone, avalía de forma dinámica a fisioloxía e a cinética do usuario, incorporando a esta información datos ambientais facilitados por outros usuarios.
· Vumbl (Reino Unido). Vumbl é un colar para deportes e actividades que monitoriza a información corporal a través das vibracións, e transmítenos estes datos mediante tecnoloxía táctil.
· Blocks (Reino Unido). Trátase dunha plataforma aberta de hardware e software para tecnoloxía wearable. Cada bloque desta pulseira intelixente pode ser un sensor, unha pantalla, un procesador ou unha batería.