Gradiant emprega sensores de 3D para o control de multitudes ou no seguimento de persoas dependentes

Un dos eidos de traballo principais de practicamente calquera centro tecnolóxico onde se desenvolvan simuladores ou aplicacións é sen dúbida a tecnoloxía 3D. O centro tecnolóxico Gradiant non é unha excepción. Segundo informan estes días fontes do mesmo, o procesado de imaxes 3D, sobre todo as obtidas a partir de sensores de profundidade de baixo custo, constitúe en boa medida un ámbito importante do seu labor. O abano temático é amplo. De feito, os seus investigadores traballan a día en hoxe en proxectos vencellados á seguridade e o comercio, a saúde e incluso á gandaría. Un exemplo concreto de todo isto é o Sistema Automático de Cálculo de Persoas, que tira partido das tecnoloxías 3D para obter unha precisión de cómputo do 95%, ata entre multitudes.
Lembrar que esta tecnoloxía, que xa foi probada con éxito en eventos de relevo como é o caso das xornadas JAI (Xornadas de Automatización Industrial da Universidade de Vigo), está baseada nun sensor de profundidade, o mesmo sensor que emprega Kinect e que na súa orixe desenvolveuse para xogar á videoconsola Xbox. O sistema que usa Gradiant é pois un sensor de fondura que xera visualizacións das persoas que pasan baixo o seu eido de visión, a través de infravermellos e determinando cales son as rexións da imaxe que se corresponden coas cabezas desas persoas, para facer desta maneira o cómputo.
Segundo informa Gradiant, as posibilidades que achegan as imaxes xeradas por Kinect non se limitan a isto, senón que tamén pode ser aplicada esta tecnoloxía de detección e seguimento para visualizar e manipular unha imaxe médica sen necesidade de contacto físico ou para detectar caídas de pacientes de idade avanzada nun centro médico. A maiores, os sensores desta índole amosan potencial para a localización de obstáculos para persoas invidentes ou para o escaneado de obxectos para a súa impresión en 3D.
Ao fío disto, Gradiant tamén está a traballar nun proxecto chamado HOLOS que tira proveito deste tipo de sensores no ámbito do control e o seguimento de pacientes dependentes e todo de xeito “non intrusivo”. Pola súa banda, noutra das súas iniciativas, TECOOPAGA, os investigadores do centro tecnolóxico avalían a calidade de carnes de vacún mediante a extracción de características relacionadas co volume do animal.