As JAI 2014 exporán en detalle as novas correntes da automatización industrial

A Escola de Enxeñaría Industrial da Universidade de Vigo (Departamento de Enxeñaría de Sistemas de Automática) vai organizar os días vindeiros, do 3 ao 7 de novembro, a sexta edición das Xornadas sobre Tecnoloxías e Solucións para a Automatización Industrial (JAI 2014). As xornadas, que contarán co apoio de entidades como a Tecnópole (Parque Tecnolóxico de Galicia), desenvolverase no centro Centro Social AFundación de Vigo (Policarpo Sanz 24-26), onde se dará acubillo, durante case unha semana, a empresas punteiras do sector da automatización industrial e a enxeñaría, a estudantes, a investigadores, a emprendedores e a colaboradores da Eurorrexión Galicia-Norte de Portugal e do ámbito iberoamericano.
Os asistentes compartirán visións e experiencias acerca dos novos vieiros polos que discorre a automatización, as solucións de software máis avanzadas, as posibilidades de emprego do sector ou, tamén, as novas aplicacións tecnolóxicas (como por exemplo a incorporación das Google Glass e os drons na actividade industrial). Por enriba de todos os obxectivos, o que se busca coas JAI é favorecer o máximo achegamento entre os representantes do sector e os seus futuros integrantes (estudantes, licenciados e emprendedores á procura do seu sitio no tecido produtivo innovador e pertencentes á devandita Eurorrexión Galicia-Norte de Portugal e a toda Iberoamérica). Falamos de favorecer a inserción laboral no alumnado ligado a estas especialidades, ao tempo que se achegan, dende estas novas sesións das JAI, as máis importantes novidades tecnolóxicas sobre aquelas.