Os clientes de Vodafone España dispoñen de cobertura 4G en dúas ducias de países

Vodafone España informou os días pasados que xa achega cobertura 4G en 25 países, un servizo dispoñible ao cen por cen para os clientes do ámbito estatal. A operadora tamén salientou que dos devanditos países 16 están en Europa, e tamén que en virtude da internacionalización do dito servizo e dos convenios formalizados alén das fronteiras, a compañía é arestora “a operadora do mercado español que ten máis acordos con firmas doutros países para achegar 4G en itinerancia”.
A listaxe é a seguinte: Alemaña, Austria, Francia, Eslovenia, Bélxica, Croacia, Grecia, Holanda, Italia, Noruega, Polonia, Portugal, Reino Unido, República Checa, Romanía e Suíza, así como en Estados Unidos, Xapón, Rusia, Corea do Sur, Brasil, Hong Kong, Nova Zelandia, Taiwán e Singapur.
Segundo engade a operadora, os clientes de Vodafone España poderán conectarse nos países devanditos a velocidades que oscilan entre os 150 Mbps en descarga e os 50 Mbps en suba de datos a Internet. “Esta mellora”, engade a empresa, “non supón custo adicional na tarifa de itinerancia (roaming) que teña contratada o cliente”.