SD Apps e Sologas, distinguidas nos Premios Ferrolterra Emprende

A cuarta edición dos Premios Ferrolterra Emprende, convocados pola Asociación local de Novos Empresarios, resolveuse onte na sede de AFundación de Ferrol. Segundo puidemos saber, este ano os galardóns foron caer nos concellos das Somozas e Narón, concretamente ás empresas Sologas e SD Apps. A primeira está centrada en solucións ambientais e na xestión e valorización dos refugallos. A firma recibiu o Premio Novo Empresario do Ano de mans do alcalde de Ferrol, Jorge Suárez, e do conselleiro de Economía, Francisco Conde. O premio leva aparellado un bono de formación de 3.000 euros na Escola de Negocios de Afundación. O accésit como recoñecemento á innovación recaeu na firma de desenvolvemento de aplicacións SD Apps, con sede en Narón e responsable de Social Drive, ferramenta que permite aos condutores compartir información en tempo real sobre o estado das estradas.
A gala de entrega de premios estivo presidida polo conselleiro de Economía e Industria, Francisco Conde, ao que acompañaron o presidente de AJE Ferrolterra, José Rilo González-Vallés, o alcalde de Ferrol, Andrés Suárez, o presidente da Deputación da Coruña, Valentín González, a presidenta de AJE Galicia, Carmen José López e o director da Escola de Negocios Afundación, Aurelio Villa.
A este IV Premio Ferrolterra Emprende presentáronse un total de 13 candidaturas, dos máis diversos sectores: medio ambiente, novas tecnoloxías, redes sociais, telecomunicacións, moda, hostalaría, alimentación e bebidas, estética e prevención de riscos e emerxencias. Do total de candidatos, cinco teñen sede en Narón e outros tantos nas Pontes, dous son de Ferrol, e 1, precisamente o gañador, das Somozas.