O rural galego estrea unha televisión en liña

Nun escenario complexo no que podemos dar por fracasadas as experiencias de Televisión Dixital Terrestre (TDT) de ámbito local en Galicia, hai iniciativas que foxen da televisión tradicional e optan polas novas plataformas de distribución para chegar ao público, e así podemos ver hoxe o nacemento de Televisión Rural de Galicia, unha canle creada grazas á colaboración dos concellos de Coles, Maside e Amoeiro, que en vez de recibirse a través da antena de televisión, chega a través da canle temática en alta definición FollowUS Televisión (FWSTV) que botou a andar na Internet o pasado mes de agosto, e que pode reproducirse en smartphones, tabletas, ordenadores e televisores conectados (sendo posible gozar dos seus contidos nun televisor ordinario valéndose dun accesorio asumible como é o Chromecast de Google).
Temos así unha nova canle de televisión en liña, que iniciou as súas emisións en probas o 14 de febreiro, e que hoxe nace oficialmente cun vídeo no que os alcaldes dos concellos que colaboran no proxecto dan a benvida aos espectadores. Explican que a nova canle facilita a comunicación dos tres concellos entre si, e aínda que cada concello terá espazos de seu, tamén acometerán producións conxuntas que axuden a dar visibilidade a realidade das vilas que emprenderon esta interesante iniciativa.