Gradiant e AtlantTIC elaboran un prototipo para salvagardar aos pasaxeiros das aeroliñas respectando a súa privacidade

O Centro Tecnolóxico das Telecomunicacións de Galicia Gradiant e o Grupo de Procesado de Sinal en Comunicacións da Universidade de Vigo (e integrado en AtlantTIC) veñen de desenvolver un prototipo que permitirá ás aeroliñas achegar á policía ou ás administracións unha listaxe de pasaxeiros cifrada, para que comproben se un ou varios sospeitosos de terrorismo figuran na mesma, sen ter acceso total á información persoal do resto da pasaxe garantindo deste xeito o dereito á privacidade e a liberdade de movementos dentro da Unión Europea. “Só no caso de que exista unha coincidencia entre as dúas listaxes as forzas de seguridade europeas ou nacionais poderían solicitar información adicional, que lles permitiría chegar ata o nome das persoas sospeitosas incluídas na pasaxe, de xeito case instantáneo”, explica Pablo Dago, enxeñeiro experto en seguridade e privacidade de Gradiant.
Indo ao enxeño en cuestión, cómpre dicir que xa se atopa pronto para o seu uso, é escalable, funciona en tempo real, co que os tempos de espera son inexistentes e amais permite procesar calquera tipo de dato que soliciten as autoridades e que as liñas aéreas inclúan nas súas listaxes. Control de pasaxeiros ao marxe, este sistema tamén podería ter outras aplicacións, como que dúas empresas comproben se teñen un cliente común sen desvelar as súas respectivas carteiras ou para protexerse de posibles fraudes.
Emporiso, o cifrado das listaxes que manexan as compañías aéreas e os estados membros sería diferente e renovada en cada voo, o que contribuiría aínda máis á seguridade de todo o sistema. “Trátase dunha comparación a cegas dos datos que se intercambian” explica Pablo Dago, “polo que nin sequera precisa a confianza mutua no bo uso do sistema, que habitualmente é o isto máis feble dentro dunha cadea de seguridade”. O investigador de Gradiant sinala que ao final só a aeroliña saberá que na súa listaxe de pasaxeiros hai un sospeitoso, e a policía, que sospeitoso é, en concreto. “Se non existen coincidencias, entón non haberá información que saia do sistema, só se intercambiarán unha serie de bits sen significado aparente, o que tamén protexe o sistema de posibles ataques de piratas informáticos”, sinala Dago.