O NOS Day celebrará a súa segunda edición o 28 de maio

Tras unha multitudinaria primeira edición do Northwest Startup Day (NOS Day), na que numerosos emprendedores galegos déronse cita na Cidade da Cultura para asistir a unha serie de relatorios orientados á transferencia de coñecemento e fuxindo da fórmula de charlas inspiradoras ou técnicas, convócase o segundo Northwest Startup Day para o vindeiro 28 de maio, mudando a sede ao Palacio de Congresos e Exposicións de Galicia.
Aínda que o programa aínda non se publicou íntegro, xa temos o seu esquema provisorio, que parte con Rubén Ferreiro (Grupo Viko) abrindo o foro de emprendedores tecnolóxicos ás 9:30 horas; seguirao un convidado sorpresa ás 10:15; mentres que Rufo de la Rosa (Google Campus Madrid) contará interesantes detalles sobre a multinacional de referencia na Rede a partires das 11:00 horas.
Tras unha breve pausa, ás 12:30 horas entrará en xogo unha convidada sorpresa, á que seguirá ás 13:15 horas Gonzalo Ruíz (Civeta Investiment), quen terá moito que compartir grazas á súa experiencia investidora en proxectos como Chicfy, iAsesoría ou JoinUpTaxi.
Xa pola tarde está prevista a celebración de dúas mesas redondas entre as 15:30 e as 17:30 horas.
Os interesados en acudir a este encontro xa poden inscribirse a través de Ticketea, onde están dispoñibles os billetes de acceso a un prezo de 5 euros, mentres que por 25 euros inclúese tamén o xantar.