Uns 30 mil chíos piden que o programa Land Rober Tunai Show volva a semana que vén

A pasada noite a Televisión de Galicia tiña previsto emitir a última entrega da tempada do programa Land Rober Tunai Show, pero tanto os responsables do espazo televisivo coma o público pensaban que aínda era cedo para o descanso estival, e ante os berros das bancadas pedindo un programa máis come se fosen os bises dun concerto, o condutor do programa, Roberto Vilar, quixo levar ese sentimento á Rede, e propúxolle aos seareiros do do Tunai Show que chiasen co cancelo #LandRoberBIS e, de conseguir liderar os Trending Topics estatais, o programa continuaría unha semana máis.
Era difícil imaxinar o impacto que tería o reto lanzado dende o programa da Galega, pois o propio cancelo do programa actual, #LandRober54, xa estaba a conseguir uns resultados magníficos (con 5.778 chíos conseguiu converterse nun dos de máis impresións na historia do programa), e pasar de apoiar ese cancelo a só unha hora da emisión, e tentar chegar á primeira posición dos tendencias de Twitter en España era un reto moi ambicioso, aínda que o público soubo estar á altura, e nos 7 primeiros minutos do reto o número de chíos de #LandRoberBIS xa superaba ao total do anterior, pulo que mantívose ata o remate da emisión, chegando a preto dos trinta mil chíos, volume case impensable para un programa dunha televisión autonómica.
Tendo en conta que os programas de ámbito estatal chegan a unha audiencia moi superior en número, que non en paixón, impresionaba ver como entre os temas en tendencia viamos como o Land Rober Tunai Show acumulaba máis chíos que Master Chef, Vis a Vis e La Que Se Avecina e, de feito, o número de chíos de #LandRoberBIS era máis do dobre que o da serie de ficción que emitía Telecinco.
Esta mañá aínda tiñan unha boa posición en Twitter os cancelos promovidos polo programa da TVG, chegando a aparecer #LandRoberBIS na sétima posición do Trending Topic internacional, segundo indicou Javi Mos (responsable das redes sociais do programa) deixando claro que Roberto Vilar, Xosé A. Touriñán, Eva Iglesias e compañía non poderán facer as maletas esta semana e terán que adiar sete días as súas vacacións.
O propio Roberto Vilar agradeceu ao público o seu apoio nas redes sociais, asegurando que “conseguistes emocionarme e darlle unha dimensión ao programa máis grande aínda! Sabemos que somos o que o noso público é, e agora mesmo somos os máis grandes, por vós, vai por vós. A semana que vén haberá un LandRoberBIS, e será máis bonito aínda!”.
Pero estes bos resultados non son só virtuais, senón que tamén teñen impacto nos datos de audiencia, e durante a pasada xornada o Land Rober Tunai Show conseguiu unha cota de pantalla do 16,3%, o que supón unha media de 165 mil espectadores, datos realmente bos no contorno actual no que as audiencias están moi fragmentadas por mor da ampla oferta audiovisual.