O Concello de Lalín prepara a inminente posta en marcha da súa Administración Electrónica

O Concello de Lalín vén de informar da boa marcha do seu proceso para afianzarse plenamente na Administración Electrónica, proceso que se atopa neste intre nos seus derradeiros axustes por parte dos técnicos municipais. Máis polo miúdo, os técnicos están a ultimar certos detalles de operatividade dos sistemas informáticos e a recoller información entre o persoal para, en palabras do Concello, “poder comezar a traballar coa ferramenta Gestiona”. Segundo fixo saber o concelleiro de Novas Tecnoloxías Tomás Vilariño, nos vindeiros días levaranse a cabo diversas sesións formativas destinadas ao persoal do consistorio en materia de eAdministración.
Tamén salienta Vilariño que se trata dunha ferramenta moi completa que vai permitir que a cidadanía empregue plenamente servizos avanzados de xestión dixital, como por exemplo a sede electrónica de Lalín ou os servizos de trámite e consulta a través da Rede. Calcúlase que o arrinque do sistema integral podería facerse a partir do 14 de febreiro. Esta aposta de Lalín pola Administración Electrónica é unha realidade grazas ao acordo previo asinado coa Deputación de Pontevedra, un convenio que posibilitará poder traballar coa devandita ferramenta Gestiona e acceder (dende o persoal municipal por enteiro) ao xestor de expedientes e á sinatura electrónica.
A respecto do complexo proceso que levou á agora inminente posta en marcha desta Administración lalinense dixitalizada, Tomas Vilariño explicou que “no Goberno local, se ben levamos moito tempo traballando na implantación da Administración Electrónica, con respecto á súa instalación definitiva tivemos que agardar á integración completa do novo equipamento informático no renovado Centro de Proceso de Datos (CPD), cuxo orzamento foi de 45.0000 euros e que permitiu melloras moi importantes no almacenamento e intercambio de información”.
Esta incorporación plena á Administración Electrónica permitiralle ao Concello pór en marcha servizos de xestión electrónica, tales como unha sede electrónica de servizo aos cidadáns ou demais sistemas de trámite e consulta a través da Rede, como pode ser a xestión en liña de expedientes e demais documentación. Este servizo, tal e como apuntou o concelleiro, “é moi completo e permitirá dar saída a unha das propostas do Goberno de Lalín, aforrándolle ademais, deste xeito, diñeiro ao Concello”. Vilariño valorou “moi positivamente” esta iniciativa “que esixirá dun cambio de filosofía tanto por parte do Consistorio como da cidadanía, ademais de requirir serios esforzos de formación para os empregados municipais”.