O Campus de Pontevedra amósanos como aproveitar a Rede para enriquecer e visualizar o noso currículo

O profesor da Facultade de Fisioterapia do Campus de Pontevedra, José Vicente Novegil, vai impartir en abril e maio un obradoiro encamiñado a achegarnos aos máis axeitados recursos para facermos da Rede un instrumento de promoción académica e profesional. Ou sexa, para tirar proveito dela á hora de amplificar ao máximo as posibilidades de visualizar o noso portfolio ou currículo enriquecido. O curso, que é aberto, desenvolverase entre o 18 de abril e o 4 de maio na Aula Tecnolóxica das Casa das Campás. Entre os días 4 e o 17 de abril manterá aberta a súa inscrición (matrícula de balde) a través da plataforma Bubela. A actividade, inserida no programa formativo da Vicerreitoría do Campus para este segundo cuadrimestre, na Aula Tecnolóxica, complétase con actividades como Introdución ao retoque fotográfico con Adobe Photoshop, que mantén aberta a súa inscrición ata este xoves 30 e para ao que aínda existen prazas vacantes.
Segundo explica o profesor Novegil, “a idea do portfolio vén do contexto da arte, onde os artistas incluían neles as súas obras, exposicións ou críticas por parte de terceiros”, actuando en sentido literal coma “un currículo enriquecido”. Segundo engade, a Rede pode amplificar ao máximo a capacidade comunicativa e expresiva deste documento, non só os seus contidos en si mesmos. Así, sinala, “a translación deste portfolio do papel ao mundo dixital permite incorporar a este unha maior variedade de materiais, “como o audio dunha determinada intervención, vídeos…”, o que suma “meirande riqueza” a este escaparate académico e profesional, á vez que permite poñelo “a disposición dunha audiencia maior”.
Partindo destas premisas, Novegil guiará ao alumnado deste curso de 12 horas na creación dos seus propios portfolios dixitais a través de diferentes programas, xa que “calquera ferramenta que permita editar é susceptible de ser un soporte para crear un”. E engade: “Quero que fagan un portfolio adaptado ao seu contexto persoal e o que vou propor son posibilidades”, salienta dunha actividade na que, nalgúns casos, optará por articular esta ferramenta a través dun blog, noutros por “aproveitar os seus perfís en Linkedin como soporte base” ou por empregar ferramentas como Google Sites.