A AMTEGA e o CPEIG argallan unha wiki sobre a informática galega e unha xornada sobre as vantaxes laborais das TIC

Sobre as vantaxes achegadas pola transformación dixital falarase na xornada organizada pola Axencia para a Modernización Tecnolóxica de Galicia (AMTEGA) e o Colexio Profesional de Enxeñaría en Informática de Galicia (CPEIG). A colaboración xurdida entre as dúas entidades, que vén de antigo, atinxirá agora varias vertentes: a creación dunha wiki sobre a Historia da Informática en Galicia; a celebración dun ciclo de xornadas sobre os perfís dixitais saídos das novas tendencias tecnolóxicas e a achega de formación especializada en TIC para empregados públicos, estudantes e familias. Así o sinalaban Mar Pereira (directora da AMTEGA) e Fernando Suárez (presidente do CPEIG) no acordo asinado por ambos.
Máis polo miúdo, celebrarase unha Xornada sobre Transformación Dixital e Talento, que dará as claves do sector tecnolóxico, expoñendo as habilidades (softskills e hardskills) para achegar valor en todos os ámbitos da transformación dixital. Este encontro está pensado para profesionais e mocidade que busque formarse neste sector; tamén, para centros formativos que queiran dar a coñecer a súa oferta educativa no eido da economía dixital; e para empresas que achegarán a súa experiencia en demanda de recursos humanos no sector TIC.
Asemade, o acordo asinado dará paso á creación dunha wiki sobre a Historia da Informática de Galicia que recolla o testemuño dos protagonistas na Comunidade, fotografías, vídeos e gravacións coa finalidade de ter un espazo na rede para amosar os contidos existentes e dar continuidade á recompilación de información de cara á súa conservación.
Haberá tamén lugar para a celebración de varias actividades no marco do programa Rapaciñ@s, unha xornada sobre os menores e as novas tecnoloxías, cunha sesión informativa para pais e nais e actividades lúdicas para os máis pequenos. A esta actividade engadiranse 20 charlas divulgativas nas principais cidades de Galicia encamiñadas ás dúbidas e preocupacións de pais e nais sobre a relación dos seus fillos coa Rede (beneficios e riscos da tecnoloxía, recomendacións sobre o uso seguro dos diferentes dispositivos TIC, técnicas de control parental ou a que organismos poden acudir en caso de dúbida...).
E se falamos de economía dixital, o CPEIG e a AMTEGA levarán adiante cinco xornadas formativas en distintas localidades galegas, dirixidas a estudantes de Bacharelato e ás súas familias, sobre as saídas profesionais da Enxeñaría en Informática.
Por último, dicir que o CPEIG impartirá seis cursos prácticos en liña e presenciais para facilitar a adaptación dos empregados públicos ao novo contexto dixital.