A Cátedra Feminismos 4.0 constata o importante número de insultos que reciben as mulleres en Twitter

A Cátedra Feminismos 4.0 Depo-UVigo é xa por dereito propio unha das fontes máis relevantes de información tecnolóxica dende unha óptica de xénero, non só polo que pon de manifesto a nivel xenérico (fendas dixitais, invisibilidade das tecnólogas e das científicas, desigualdades que se agrandan nas carreiras STEM, machismos que inzan as redes sociais) senón polo específico das investigacións que abrollan da cátedra. Este primeiro de marzo puidemos coñecer un traballo realizado polo profesor da Facultade de Ciencias Sociais e da Comunicación Xabier Martínez Rolán e a investigadora da Universidade da Coruña Teresa Piñeiro que pon de manifesto o papel que xoga Twitter en materia de discriminación e agresións verbais, un problema que se ceba especialmente coas mulleres e, especialmente, coas xornalistas e coas políticas.
“Twitter revélase como un territorio hostil para as mulleres, con especial incidencia naqueles ámbitos de maior proxección pública, como a política e a comunicación, que cumpren unha función esencial nas sociedades democráticas”. Esta é unha das principais conclusións do proxecto Mulleres pontevedresas na rede. Análise do sexismo, misoxinia e discurso do odio en Twitter, seleccionado na convocatoria de investigación da cátedra que promoven a Universidade de Vigo e a Deputación de Pontevedra. O traballo baseouse na análise das publicacións realizadas ao longo dun ano por 50 mulleres de “recoñecido prestixio”, 22 delas vinculadas á provincia de Pontevedra, así como das interaccións cos seus perfís dos usuarios e usuarias desta rede social. En total, Rolán e Piñeiro analizaron máis de 550.000 chíos, entre os que detectaron 62.560 que contiñan insultos e comentarios ofensivos, a meirande parte, o 96%, dirixidos a políticas e xornalistas.
“Este estudo nace da crecente preocupación polo discurso do odio e sexismo que atopamos día a dia na Internet”, sinalan os investigadores no póster no que presentan as conclusións dun proxecto que se completou coa creación dunha páxina web e unha serie de podcast nos que analizan os resultados da investigación.
A análise abrangueu as 41.103 publicacións propias realizadas ao longo dun ano por 50 profesionais e as 302.790 interaccións que se produciron cos seus perfís, así como outras 208.797 “mencións indirectas”, chíos que as nomeaban sen citar a súa conta nesta rede social.
“Os resultados son como para preocuparnos como sociedade supostamente avanzada”, salienta Martínez Rolán do detectado nesta “análise do contido da conversa social 2.0”. Así, as conclusións deste estudo alertan do “sexismo imperante nos social media”, así como da “normalización do discurso do odio” nas redes sociais.
O proxecto comprendeu, en primeiro termo, unha “análise de contidos automática, seguindo unha serie de palabras que nos permitiron analizar o alcance do discurso do odio verbal en Twitter”. Nela, detectáronse 62.560 publicacións que contiñan insultos, presentes no 15% das interaccións directas cos diferentes perfís e no 10% das mencións indirectas.
O proxecto abrangueu tamén “unha medición de sentimento e análise do discurso” de acordo coas categorías establecidas na pirámide do odio da Anti-Defamation League, que agrupa os comportamentos cargados de prexuízos en diferentes categorías. Esta análise levouse a cabo cunha “submostra” composta por 666 chíos, todos eles mencións directas. Desta serie de mensaxes só o 15% foron cualificadas como “positivas” polos investigadores, mentres que nun 61% dos casos recibiron a consideración de negativas.