A Deputación de Ourense, pioneira en formar pilotos de drons para emerxencias
martes, 26 de setembro do 2017
A Deputación de Ourense organiza, en colaboración
co Consorcio Provincial de Ourense para o servizo contra Incendios e
de Salvamento e da empresa galega Aerocamaras,
o que sería, en palabras da entidade provincial, “o primeiro curso
en España de piloto de drons para situacións de emerxencias con
homologación”. A
iniciativa formativa foi dada a coñecer este luns na sede
provincial, nun acto no que participou o vicepresidente da
entidade, Rosendo Fernández; o presidente do dito Consorcio e
deputado provincial, Pablo Pérez; e o director executivo de
Aerocamaras, Jaime Pereira. Entre os obxectivos do curso está o de
fornecer de coñecementos para apoiar aos equipos que interveñen en
situacións de emerxencia, facilitando tarefas como a visualización
remota de espazos afectados a través de dispositivos tecnolóxicos,
o transporte de material “e outras accións de apoio aéreo”.
En canto ao alumnado, Pablo Pérez dixo que se
creará unha base no Carballiño con sete bombeiros formados onde vai
estar esta unidade especialista de piloto de drons en situacións de
emerxencia.
O curso, que formará a un total de vinte
profesionais e voluntarios de Emerxencias, permitirá que os
participantes obteñan un título homologado pola Academia Galega de
Seguridade Pública (Xunta de Galicia), así como o certificado
oficial da Axencia Estatal de Seguridade Aérea para ser piloto
profesional de drons.
Tal e como explicou Jaime Pereira, a formación
semipresencial comezou o día 18 de setembro, coa parte online
do curso oficial de piloto de vehículos aéreos non tripulados, que
terá as súas clases presenciais os días 23 e 24 de setembro no
Pazo de Vilamarín. A parte dixital do curso de piloto de drons en
situacións de emerxencias comezará o vindeiro 16 de outubro,
mentres que a súa parte presencial será os días 25, 26 e 27 de
outubro no Pazo de Vilamarín, no parque de bombeiros do Carballiño
e no embalse das Conchas en Muíños, respectivamente.