A Deputación de Ourense, Premio Iniciativa da Administración do CPEIG
xoves, 27 de abril do 2017
O Colexio Profesional de Enxeñaría en
Informática de Galicia (CPEIG) comezou definitivamente a súa
tempada de recoñecementos: os premios que anualmente concede a
entidade profesional galega aos profesionais, institucións,
organismos, asociacións, investigadores, centros tecnolóxicos e
empresas máis destacadas da nosa terra no ámbito do impulso á
Sociedade da Información. Sen ir máis lonxe, este mércores
puidemos saber que o Premio
Iniciativa da Administración do CPEIG vai ir dar á Deputación de
Ourense pola súa iniciativa Ourense Provincia Intelixente. O
xurado valorou “a aplicación do concepto de Smart City ao
eido provincial”, de xeito que “unifica e centraliza esforzos nun
gran proxecto cunha visión global da provincia”. O galardón
entregarase no decurso da Noite da Enxeñaría en Informática de
Galicia, que terá lugar en Santiago o vindeiro 16 de xuño. Xunto á
Deputación de Ourense, outras entidades e persoas recibirán os seus
premios.
Segundo explica o CPEIG, son moitos os ámbitos
nos que destaca Ourense Provincia Intelixente. En termos concretos, o
proxecto provincial de visión global sumará a xestión de 7.273 Km
e solucións para os seus 424.652 habitantes, dos que 109.779 son
residentes no exterior. O CPEIG tamén lembra que a iniciativa xa
está en marcha (logo dunha primeira fase de análise e definición)
e que se trata dun programa abeirado ao Plan Ourense 15/19 que
recolle 77 accións a executar en 48 meses. Con estas accións, o
obxectivo é “converter a provincia nun referente nacional e
internacional”, de xeito que a Deputación sexa un “Concello de
concellos” baixo unha visión global para atender os 92 municipios
da provincia.
Á hora da concesión do galardón, os membros do
xurado do CPEIG valoraron “a xestión da información dos concellos
desde un punto de vista único con tres obxectivos: cooperación,
optimización de recursos e redución de custos”. Deste xeito,
sinalou o equipo encargado de facer as valoracións, “conseguirase
a mellora do modelo de gobernanza; transparencia e apertura dos
gobernos, e a mellora da calidade dos servizos prestados e control
dos contratos de servizos, ao mesmo tempo que se optimiza a calidade
medioambiental da provincia; a redución do gasto público e a
mellora da coordinación entre servizos e administracións, así como
o apoio aos gobernantes na mellora da toma de decisións, e o fomento
da innovación e o emprendemento”, explicou o xurado.
Informar tamén que a plataforma Provincia
Intelixente integrarase con sistemas expertos aplicábeis a cada eido
temático: solución transversal para todos os sistemas de
información, recompilación de información desde diversas
solucións, analítica (descritiva e preditiva) da información
recompilada, e interoperabilidade e reutilización. “Todo isto”,
sinalou o xurado, “redundará nun gran obxectivo final, que é
incremento da calidade de vida da cidadanía e xestión prudente dos
recursos”.