A Deputación de Pontevedra dota a 14 concellos da provincia de tótems turísticos interactivos

A Deputación de Pontevedra vén de dotar a 14 concellos turísticos da provincia de cadanseus tótems interactivos que proporcionan información turística en tempo real do destino ás e aos visitantes. A instalación fíxose ao abeiro do proxecto europeo Tourist Inside. Atópanse en Nigrán, Meis, Poio, Cuntis, Caldas de Reis, Cambados, A Illa de Arousa, Meaño, Ribadumia, Baiona, A Guarda, Salvaterra de Miño, Silleda e Pontevedra, todos eles concellos con oficinas de información turística adheridas á Rede Info Rías Baixas da institución provincial.
A deputada de Turismo, Ana Laura Iglesias, visitou os elementos que veñen de ser instalados en Poio, concretamente na praza da Chousa de Combarro, e en Meis, no Mosteiro de Armenteira, a través dos cales proporcionarase información ás persoas visitantes sobre os puntos de afluencia turística. Estes equipamentos, ademais, servirán para achegarao destino información relevante para a planificación e toma de decisións relativa ás buscas que as e os turistas fan, a afluencia de visitantes ou a posible orixe das e dos mesmos, tendo en conta para iso o idioma que empregan.
Os tótems informativos complementan os que se instalaron xa o pasado verán ao abeiro de Tourist Inside no interior das oficinas de turismo dos 14 concellos. Este proceso formou parte dun impulso provincial de dixitalización, que incluíu tamén a posta en marcha doutros sistemas interactivos como videowalls, monitores ou tabletas. Ademais, dotouse ás oficinas de ferramentas para garantir a accesibilidade, como audio-guías con linguaxe de signos, impresoras Braille ou puntos de información bucle magnético.
Por outra banda, no marco deste programa europeo, converteuse a praia América, en Nigrán, nunha Smart Beach empregando a intelixencia e a transformación dixital para garantir un turismo sustentable.
O obxectivo de Tourist Inside, que conta cun orzamento de 1.108.280 € e está financiado ao 60% por Red.es a través de fondos FEDER e ao 40% pola Deputación, é “transformar o territorio nun destino intelixente”. Ademais, busca mellorar a eficiencia enerxética e reducir a pegada de carbono asociada á actividade turística, fomentar a interoperabilidade coas distintas administracións e axentes, promover o acceso transparente e universal aos datos públicos do servizos, implantar ferramentas e sistemas baseados en estándares interoperables, impulsar métricas de medición da satisfacción da cidadanía e ao dos e das súas visitantes, o aforro de enerxía e a redución da pegada de carbono e xerar riqueza na contorna turística da provincia.