A Industriosa organiza unha nova kata de Python este sábado 4 de marzo

O vindeiro sábado 4 de marzo continuarán en A Industriosa (Vigo) as katas de Python, nova xeira (a oitava) dun ciclo de eventos informais e abertos a calquera persoa que se anime a participar e compartir unha hora e media da dita linguaxe de programación informática e café e/ou té.
Estes encontros están baseados nos formatos dos kataiunos, dos dojos e doutras actividades similares, segundo explican dende a organización, que engaden que as reunións soen artellarse en grupos en grupos de 2/3 persoas para resolver retos concretos de programación, compartir e mellorar as habilidades en Python. “Durante 90 minutos intentaremos resolver un desafío, desenvolvéndoo iterativamente e co obxectivo de aprender novos enfoques do problema”, engaden.
Tamén explican que “non é esencial que traiamos un portátil e tampouco e imprescindible instalar Python xa que a axenda pasa directamente por traballar en recursos online”.
A participación é de balde. Temos toda a información sobre o encontro en Meetup.
A cita está organizada por A Industriosa e coa colaboración de Python Vigo e patrocinado por Xunta de Galicia e AMTEGA (Axencia para a Modernización Tecnolóxica de Galicia).