A PSPD denuncia a Vodafone polo envío de spam a móbiles

A Plataforma pola Seguridade e a Privacidade Dixital (PSPD), integrada pola AI, ADECES e a Unión de Consumidores de Galicia (UCGAL), vén de denunciar a alianza empresarial formada polas operadoras de telecomunicacións Vodafone e Ono ante a Axencia de Protección de Datos. O motivo? Segundo nos contan dende a plataforma galega de usuarios, por prácticas de subministro de correo lixo (spam) a través de mensaxes de texto ao móbil. Segundo solicitan as plataformas perante a axencia, cómpre obrigar ás compañías a cesar este tipo de comunicacións electrónicas, e imporlle a Vodafone “a correspondente sanción por falta grave”.
Amais, a plataforma das entidades de consumidores consideran que o devandito envío de mensaxes non solicitadas é motivo de reflexión e e crítica acerca da entrada en vigor do novo Regulamento Europeo de Protección de Datos e o seu alcance presente. Segundo explican, “non deben as autoridades de control flexibilizar as esixencias deste ou outras normas conexas como a Lei 34/2002, do 11 de xullo, de Servizos da Sociedade da Información e de Comercio Electrónico
(LSSI). Na súa denuncia, a PSPD salienta que o envío masivo e reiterado de comunicacións electrónicas vía SMS por parte de Vodafone-ONO vulnera o artigo 21.1 da LSSI, o cal esixe para “o envío de comunicacións promocionais ou publicitarias por correo electrónico ou outro medio de comunicación electrónica equivalente deben ser solicitadas ou expresamente autorizadas
polos destinatarios das mesmas”. As plataformas explican que neste caso concreto, segundo o apartado 1, nin o silencio nin o rexeitamento das comunicacións a través da ligazón NON+ Publi (ou outros semellantes) “lexitiman o envío destas comunicacións a falta de petición ou autorización expresa”.