A RAGC entrega os seus Premios de Investigación

A Real Academia Galega de Ciencias (RAGC) celebrou na tarde deste 1 de marzo o acto de entrega dos Premios de Investigación Ernesto Viéitez Cortizo 2022, que tiveron lugar no Pazo de San Roque, en Santiago de Compostela. Na súa 32ª edición, estes galardóns promoven e recoñecen a investigación no eido das matemáticas, física e ciencias da computación; química e xeoloxía; bioloxía e ciencias da saúde; ciencias técnicas; e ciencias económicas e sociais. Presentáronse un total de 66 traballos, tanto na modalidade de investigación sénior, dotado con 6.000 euros, como de mozos investigadores menores de 30 anos, dotado con 2.000 euros.
No evento estivo o presidente da RAGC, Juan Lema. Asistiron ademais o vicerreitor de Transformación Dixital e Innovación da Universidade de Santiago, Gumersindo Feijoo; a vicerreitora de Estudantes, Participación e Emprego da Universidade da Coruña, M.ª José Lombardía; o xerente da Axencia de Coñecemento en Saúde, Antonio Fernández-Campa; e o comandante director da Escola Naval Militar de Marín, Pedro Cardona, entre outros.
O proxecto premiado na modalidade sénior foi para o equipo liderado por Diego Peña, do Centro de Investigación en Química Biolóxica e Materiais Moleculares (CiQUS) da USC, xunto a investigadores da compañía IBM en Zúric e das Universidades de Oxford, King Abdullah de Arabia Saudita e Regensburg (Alemaña). Lograron modificar moléculas individuais de forma selectiva, rompendo ou formando ligazóns entre os seus átomos a vontade. O avance, que foi portada da revista Science, permitirá crear máquinas moleculares artificiais capaces de realizar tarefas como a distribución intelixente de fármacos.
O proxecto premiado na categoría de investigadores mozos foi para un traballo destinado á detección de desinformación relacionada coa saúde nos medios online, liderado por Marcos Fernández, do Centro Singular de Investigación en Tecnoloxías Intelixentes (CiTIUS) da USC. O equipo desenvolveu un sistema mediante a Intelixencia Artificial e o procesamento da linguaxe natural. O traballo foi publicado en 2022 na revista Engineering Applications of Artificial Intelligence.
A Academia concedeu unha mención honorífica a un proxecto centrado na aplicación dos residuos da depuración de bivalvos en Galicia para a recuperación dos ecosistemas mariños mediante a creación de arrecifes artificiais. É un proxecto coordinado por Luis Carral, da Escola Politécnica de Enxeñaría de Ferrol (UDC).
Tamén se concedeu a mención a un traballo dirixido por Sergio Vila, desenvolvido no Centro Interdisciplinar de Investigación en Tecnoloxías Ambientais (CRETUS) e na Facultade de Psicoloxía da USC, que analiza por que a cidadanía se amosa reticente ao uso de auga reciclada como solución á escaseza deste recurso.