A UDC e Defensa asinan un convenio de colaboración en temas de Xestión do Dato e a Intelixencia Artificial

O reitor da Universidade da Coruña, Julio Abalde Alonso, e o Almirante Xefe do Arsenal de Ferrol, Ignacio Frutos Ruiz, en representación do Ministerio de Defensa, por delegación da Ministra de Defensa, asinaron onte un convenio de colaboración en temas de Xestión do Dato e a Intelixencia Artificial que recolle que o proxecto de creación da Cidade das TIC, impulsado pola Universidade da Coruña, é unha oportunidade máis de colaboración entre a UDC e a Armada, para intercambiar experiencias e coñecementos nos campos do convenio. É por isto que ambas institucións consideran adecuada e desexable unha colaboración neste ámbito. O acordo, cunha vixencia de catro anos, é un convenio marco que se concretará en futuros acordos específicos.
Segundo explicou o reitor, este é “un convenio para traballar conxuntamente en actividades vinculadas á aplicación da IA e a Xestión do Dato desde o punto de vista de investigación, aplicación e formación a través da Cidade das TIC e da Escola de Especialidades Antonio de Escaño de Ferrol e o Centro de Intelixencia da Armada en Marín”. Nalgunhas actividades a UDC xa está a traballar conxuntamente coa Escola de Especialidades Antonio Escaño de Ferrol para dar formación en temas de big data e Intelixencia Artificial. Parte destas actividades estanse a desenvolver, continuou Abalde, no Centro Mixto de Investigación UDC-Navantia no que se están a buscar e a aplicar solucións de Intelixencia Artificial e big data para as fragatas.