A UDC xunta esta semana aos expertos máis referenciais da confluencia entre TIC e defensa

Este xoves 3 de novembro van dar comezo na Coruña uns encontros de gran interese para dous colectivos cuxa colaboración non para de medrar: os nosos profesionais e investigadores das novas tecnoloxías da información, por unha banda, e as entidades e as firmas ligadas a velar pola seguridade da cidadanía, pola outra. Falamos da cuarta edición das Xornadas sobre Seguridade, Defensa, Tecnoloxías Matemáticas e Computacionais. O evento, que se estenderá ao longo de dous días, desenvolverase na sede do Centro de Investigación TIC da Universidade da Coruña (o centro CITIC). En virtude destas xornadas, o CITIC acollerá aos maiores expertos do panorama nacional co obxectivo de potenciar as Tecnoloxías da Información e as Comunicacións (TIC) e as tecnoloxías matemáticas e de cálculo nos devanditos ámbitos ligados á protección. Nun plano máis concreto, presentaranse detalles do pioneiro e revolucionario prototipo de dron autónomo para a vixilancia do interior de edificios, desenvolvido por Avansig, firma da Coruña con sede no CITIC.
Segundo informan os organizadores das xornadas, estas veñen cun inmellorábel precedente: o éxito das anteriores edicións, que “referendan a relevancia destes encontros”, nas súas palabras “fitos anuais clave para o sector empresarial, organismos internacionais e comunidade científica”.
Desta volta, nesta nova edición do evento, abordaranse temáticas punteiras a través de relatorios relacionados cos principios da nanotecnoloxía, a futura serie de fragatas F-110, a computación cognitiva, as comunicacións en contornas adversas e a detección e seguimento de lixo espacial, entre outros moitos asuntos de interese.
Estas xornadas realízanse grazas á colaboración entre o Centro Superior de Estudos da Defensa Nacional (CESEDEN), o Instituto Tecnolóxico de Matemática Industrial (ITMATI), o Centro de Investigación en Tecnoloxías da Información e as Comunicacións (CITIC) e a Universidade da Coruña (UDC), coa colaboración do Instituto Matemático Interdisciplinar (IMI) da Universidade Complutense de Madrid.
Intervencións destacadas
As sesións de apertura e peche das xornadas contarán, respectivamente, coas intervencións de Salvador Naya, vicerreitor de Política Científica, Investigación e Transferencia da UDC e vicepresidente de ITMATI, e Julio Abalde, reitor da UDC. Trala inauguración, o día 3, celebrarase un relatorio a cargo do capitán de navío Antonio Juan González García, xefe do Programa SCOMBA (Sistema de Combate dos Buques da Armada) e membro da Xefatura de Apoio Loxística da Armada.

A tecnoloxía Drone Service da empresa galega Avansig, con sede no CITIC

Do mesmo xeito, outro momento destacado destas xuntanzas poderá vivirse da man da empresa Avansig, que realizará unha demostración en vivo da devandita tecnoloxía Drone Service, un sistema de seguridade que, como dixemos, baséase no emprego de drons autónomos e diríxese a dar servizo e cobertura para interiores. Ademais, entidades e empresas referenciais como EGATEL, EMAD, DGAM-Gespro, Roa, Prosegur, Hewlett Packard Enterpreise, IBM ou EMETEL achegarán cadansúa visión sobre as posibilidades da información inxente (Big Data), a intelixencia cognitiva ou a ciberseguridade para os ámbitos da defensa e a protección.