A USC mostra como loitar contra o plaxio botando man do software Turnitin
mércores, 23 de maio do 2018
Cando a información investigadora medra e está
máis dispoñíbel que nunca, a copia ilícita dunha información
concreta (un traballo, unha proposta, unha contribución científica
ou tecnolóxica) non tarda en abrollar. A práctica do plaxio, nestes
tempos de vida acelerada e de currículos dubidosos, está máis viva
ca nunca. Para poñer ao día á comunidade universitaria sobre
xeitos de combatelo, a
aula e-Terra da Biblioteca Intercentros do Campus Terra da USC acolle
esta semana (onte e hoxe) a actividade formativa Uso da ferramenta
antiplaxio Turnitin. O obradoiro está destinado a
profesorado da USC en Lugo que dirixa teses de doutoramento, así
como traballos de fin de grao e/ou mestrado, e que posúa a licenza
para o manexo desta ferramenta.
Búscase que os participantes tomen conciencia “do
problema ético e metodolóxico que supón o plaxio” e que aprendan
a manexar o software Turnitin, que
ten a capacidade para revisar documentos na procura de contidos non
orixinais. O curso, impartido polo profesor do Departamento de
Economía Financeira e Contabilidade da USC, José Raúl Canay Pazos,
está a achegar recursos de utilidade a corenta e cinco docentes do
Campus Terra. O alumnado divídese en tres quendas: aos quince que
serán formados o 22 e 23 de maio, hai que sumar os trinta restantes
que recibirán formación o 5 e 6 de xuño, quince en quenda de mañá
e quince en quenda de tarde.
A actividade formativa responde a cuestións como
que é o plaxio (identificando as súas causas), así como
procedementos de detección e prevención; e amosa como se
xestiona a conta deste software, entre outros contidos que se
reparten ao longo de doce horas, seis das cales realízanse a través
do campus virtual, mentres que as outras seis son presenciais.
A USC engade que dende marzo deste ano, posúe xa
2.000 licenzas da ferramenta antiplaxio Turnitin, das cales 340
pertencen a docentes do Campus Terra.