A UVigo implícase nun proxecto para impulsar a IA no leste de África
martes, 7 de febreiro do 2023
A
illa de Zanzibar acolle esta semana a xuntanza de lanzamento dun
proxecto destinado a iniciar, con tecnoloxías IA e IoT, a
transformación da vertente leste do continente africano. Chámase
CBHE Ahumain, Applied human machine intelligence in east Africa e trátase dunha iniciativa de cooperación educativa que ten
como obxectivo concreto “impulsar a Intelixencia Artificial e a
ciencia de datos no leste de África creando un plan de estudos que
permita formar as enxeñeiras e enxeñeiros do futuro”. A
Universidade de Vigo é un das 31 participantes nesta iniciativa, que
reúne tanto universidades como empresas de España, Bélxica,
Chipre, Tanzania, Uganda e Kenia.
Con
tres anos de duración e coordinado pola Artesis Plantjin Hogeschool
de Amberes, a representación da UVigo neste proxecto corre a cargo
da directora da EE de Telecomunicación, Rebeca Díaz, e os
profesores Ana Fernández Vilas e Manuel Fernández Veiga, todos eles
investigadores do Departamento de Enxeñaría Telemática e do centro
AtlantTIC.
Segundo
explican, o proxecto nace “nun contexto de revolución tecnolóxica
no que dúas grandes tendencias están cambiando o mundo”. Por unha
banda a Internet das Cousas (IoT) e, pola outra, a Intelixencia
Artificial (IA). Como explican os impulsores desta iniciativa,
“mentres a IoT produce datos de sensores, a IA axudará a
interpretar estes datos de maneira comprensíbel e a tomar decisións
semiautomáticas para controlar certos procesos físicos”.
Neste
senso, a finalidade de CBHE Ahumain é “lograr que as empresas máis
grandes de África adopten a IA para os seus procesos comerciais”.
Por este motivo, indican os investigadores da UVigo, será necesario
crear un “ecosistema de IA que reduza os seus custes de
desenvolvemento, axude a crear aplicacións de IA adaptadas ás
necesidades locais e reduza a súa dependencia de empresas
estranxeiras”. Ademais, engaden, un ecosistema africano de IA
podería posicionarse “como un socio atractivo para os xigantes
dixitais globais desexosos de entrar no mercado africano”.
Para
convertelo en realidade, os socios de Ahumain traballarán no deseño
dun plan de estudos consistente con diferentes especializacións e
adaptado á situación de África oriental que conduza a unha nova
xeración de enxeñeiras e enxeñeiros híbridos cun coñecemento
profundo dos diferentes aspectos e que sexan quen de conectar todas
as partes implicadas a “un sistema útil e comercialmente viábel”.
Ao mesmo tempo, tamén se traballará en aplicacións da vida real de
IA, implementación operativa e casos de negocios, para rachar coa
teoría e dar paso a aplicacións prácticas.
O
papel da Universidade de Vigo, como explica Manuel Fernández Veiga,
é colaborar na definición dos cursos e contidos formativos en AI e
ciencia de datos, adaptados ás necesidades socio-económicas da
rexión. “Os cursos son competenciais e buscan preparar
profesionais capaces de desenvolver aplicacións de AI/DS en
agricultura, pequenas empresas, etc. orientadas á resolución de
problemas de ámbito social como agricultura de precisión, saúde
primaria, clima ou sustentabilidade dos recursos”. Ademais, a UVigo
é responsábel dun paquete de traballo dedicado á formación de
formadores, é dicir, á preparación metodolóxica de persoas que
vaian impartir eses cursos na rexión”. Para isto, artellarase unha
visita das delegacións de Uganda e Tanzania a Vigo en 2024, onde
asistirán a seminarios específicos tanto técnicos como de métodos
e enfoques de ensino sobre estas tecnoloxías, con vistas a
implantalas de forma efectiva nos currículos das universidades e os
centros participantes.
A
xuntanza de arranque do proxecto arrancou este luns 6 de febreiro e
estenderase ata o sábado na illa de Zanzíbar, en Tanzania. Esta
reunión, explican dende a UVigo, “marca o inicio operativo,
administrativo e xerencial do proxecto e nela discutiranse, por
exemplo, os diferentes paquetes de traballo e as encomendas de cada
socio, así como as disposicións orzamentarias e as garantías de
calidade ou as ferramentas cooperativas en liña”.