A galega Muutech axuda a mellorar rendemento das empresas e evitar problemas de produción

Os tres fundadores da empresa galega Muutech

Entre as novas firmas innovadoras galegas que están a coller impulso e voar, Muutech Monitoring Solutions atópase entre as que separan máis centímetros do chan. Recentemente finalista nos Premios TIC Galicia, trátase dunha startup de revolucionarias solucións para a monitoraxe e control de contornas de sistemas de información, industriais e de produción. Ten o engadido extra de ser filla do seu tempo: ofrece solucións tecnolóxicas para o día de hoxe pero tamén con vistas ao futuro que se aveciña, un futuro onde a Industria 4.0 (automatizada, sustentábel, rendíbel, eficiente, intelixente) estará tan normalizada que xa non teremos necesidade de falar dela. Un dos puntos fortes de Muutech, que ten a súa sede en Nigrán, reside en que ofrece solucións de despregue rápido e doado para a xestión de dispositivos de rede, industriais e IoT (Internet das Cousas) e todo de maneira centralizada e global.
Ou sexa, trátase de facer sinxelo o que sempre pensamos que por forza debía ser complexo: operacións diarias de xestión de todo o relacionado coa actividade dunha empresa, teña esta a envergadura que teña (dende a xestión da experiencia do usuario final en aplicacións até rendementos a nivel de dispositivo, ou maquinaria industrial). Un dos grandes obxectivos de Muutech é mellorar o rendemento de empresas de moi variada índole, amais de impulsar os seus procesos de crecemento. Neste punto, axúdalles a adiantarse aos erros e corrixilos de forma rápida en caso de que acaezan, pero sobre todo axúdalles a non repetilos. En termos máis concretos, a tecnoloxía que pon en xogo a startup galega permite evitar paradas de produción, detectar anomalías e establecer alarmas sobre as mesmas con marxe de abondo para emendalas. Isto conséguese con técnicas de Machine Learning, aprendizaxe máquina. Outra das tecnoloxías das que bota man é a Realidade Aumentada.
Muutech, posta en marcha hai apenas un ano e medio por tres emprendedores novos que compartían o obxectivo común de optimizar o rendemento das empresas e empurralas con tecnoloxías intelixentes: Víctor Calvo, Óscar González e Fernando Fernández-Valdés. O ano pasado, a súa ferramenta tecnolóxica para facer monitoraxe de todas as etapas de produción foi finalista (xunto con outras oito iniciativas) no programa de emprendemento da Universitat Oberta de Catalunya (UOC). Tanto neste como noutros outros moitos recoñecementos recibidos valorouse a capacidade de Muutech para facer exhaustivo seguimento de toda a engrenaxe integral dunha empresa: robots e máquinas de produción, servidores ou mesmo comunidades de redes sociais. Segundo comentaron Víctor, Óscar e Fernando nunha entrevista recente, “no mercado actual non hai ningunha outra solución que sexa quen de xuntar todos estes datos da actividade dunha empresa e que o faga de maneira tan visual e doada de entender”. A maiores, a tecnoloxía de Muutech é aplicábel a todo tipo de sectores, poñendo unha ampla marxe de personalización para cada tipo de usuario. Segundo engaden, “o noso sistema é igual de operativo e útil para calquera profesional, ben sexa un operario ou un directivo”.
Outro dos puntos nos que fan fincapé é no importante oco que vén a encher a súa solución nunha demanda empresarial que vén de antigo: a de poder contar cun equipo de enxeñeiros que se adiquen a aplicar ferramentas específicas de xestión e seguimento na rutina diaria dunha empresa. Isto, sinalan, non é viábel para todas as compañías, polo que cumpría que alguén movese ficha e achegase a monitoraxe como un servizo e que asumise a parte máis complexa desta actividade, descargando ao usuario desta vertente tecnolóxica e permitíndolle adicarse ao seu quefacer.