A galega R premiada unha vez máis pola calidade do seu servizo de atención ao cliente
venres, 11 de outubro do 2013
A Asociación
Española de Expertos na Relación cos Clientes (AEERC) vén de
galardoar o traballo do Centro de
Atención ao Cliente de R facéndolle entrega do Premio á
Excelencia na Atención CRC de Ouro 2013
na categoría de
Telecomunicacións, recoñecemento que o operador
galego
recibira xa en dúas ocasións anteriores (nos anos 2008 e 2011).
Para facerse con esta distinción, a empresa
galega R tivo que competir con empresas de toda España,
someténdose a exhaustivos
estudos de investigación, enquisas e
entrevistas por parte da consultora IZO.
Lembrar que o Centro de
Atención ao Cliente de R conta con máis de 600 axentes situados en
13
plataformas de comunicación cos usuarios en diferentes puntos de
Galicia e xestiona mensualmente arredor
de 300.000 chamadas.
Emporiso, un dos factores máis valorados polos destinatarios dos
servizos de R é o trato
próximo dos axentes que os atenden, “xa
que eses profesionais sempre se atopan moi preto deles, sempre dentro
da súa comunidade, podendo expresarse o cliente na súa lingua, o
galego”, informou a compañía galega con motivo da devandita
distinción e valorando os motivos para tela recibido. Así,
prosegue, “ao estar na súa mesma área xeográfica, os axentes ata
poden
coñecer por experiencia propia os servizos dos que se lles
fala ou dispoñer deles nos seus
fogares, o que os converte en
coñecedores reais, en usuarios ou mesmo en prescritores
convencidos
destes servizos”.
Asemade, engade a
operadora facendo fincapé na galeguidade de todo o que rodea aos
seus departamentos de comunicación cos usuarios, a solución
tecnolóxica empregada para optimizar as plataformas do centro de
atención ao cliente de R desenvolveuna tamén unha empresa galega,
2Mares, salientada tamén no seu momento con outro galardón
de calidade por este sistema de atención en
telecomunicacións.
Esta aposta da galega R,
dende o seu nacemento, por desenvolver toda a súa actividade en
Galicia, incluíndo os seus Centros de Atención ao Cliente, parte,
segundo fontes da
operadora “dunha
idea de proxecto integral de aposta por Galicia a todos os niveis,
que
implica a confianza nesta terra para desenvolver de xeito
excelente calquera iniciativa que
se propoña”.