A galega Senseitrade lanza a súa primeira competición mensual de bolsa
luns, 9 de xaneiro do 2017
- David Conde e Juan Carlos Díaz, cofundadores de Senseitrade
A nova firma innovadora
Senseitrade, acabada de
emprazar na Tecnópole de
Ourense, vén de achegar unha aplicación de seu que nos axuda a
tirar proveito da inxente información de valor que se publica nas
redes sociais (o que se coñece como Big
Data social) para tomarmos as mellores
decisións en materia de investimento en bolsa. Ao abeiro desta
aplicación e para dala a coñecer como se merece, Senseitrade lanzou
este luns o que sería o seu primeiro torneo de bolsa, unha
competición de periodicidade mensual que ten como acubillo e espazo
de desenvolvemento a propia ferramenta web. Esta, sinalan os
responsábeis da firma, ten a
capacidade de recomendar os valores nos que
convén investir utilizando a información que flúe
nas redes sociais en tempo real.
Senseitrade, como
lembraremos, é gañadora do certame de
aceleración de empresas Vía Galicia na súa edición de 2015. No
seu haber figura a devandita app
(tamén chamada) Senseitrade, dispoñíbel para iOS
e para Android,
desenvolvida co obxectivo de tirar proveito das comunidades 2.0, en
especial Twitter, como emprazamentos de información onde se deciden
boa parte dos camiños que vai seguir a bolsa
Hoxe luns a empresa lanza o seu
I Torneo Mensual de Bolsa a través da súa aplicación.
Segundo explica a Tecnópole acerca do seu
funcionamento, o usuario que máis diñeiro
virtual logre amorear
operando coa aplicación, levará un iPad mini. “Este será o
primeiro dunha serie de desafíos que lanzaremos ao longo do ano 2017
para que os usuarios poidan gañar premios mentres aprenden a
investir en bolsa”, anuncian os
impulsores de Senseitrade.
Segundo engade a Tecnópole, o
xermolo desta iniciativa empresarial partiu dun
estudo da Universidade de Múnic no que, tras
avaliar polo miúdo
máis de 250.000 chíos
sobre bolsa, concluíuse
que é posíbel predicir
a súa evolución cun 87% de acerto. A partir da análise das redes
sociais, Senseitrade ofrece unha serie de funcionalidades para que
“calquera persoa poida acceder ao investimento en bolsa sen ser un
experto”. A maiores, os impulsores da
iniciativa quixeron fornecer aos usuarios dunha ferramenta que “non
só fose interesante para investidores que
están a encetar a súa carreira
profesional, senón tamén para traders
máis profesionais que utilizan outras ferramentas de análise de
bolsa pero que queren confirmar as súas previsións con información
do que se está comentando nas redes sociais”.