A plataforma Descúbreas lanza a súa terceira edición

A Deputación de Pontevedra, en colaboración con Regalamúsica, preparou unha nova edición do programa Descúbreas, a plataforma tecnolóxica para fomentar o talento feminino ma industria musical. O tiro de saída da nova convocatoria será este próximo mércores ás 20.00 horas, cando a Deputación celebre na sede de Vigo da institución provincial “un grande evento de apertura en formato gala-concerto”. A gala estará conducida por dúas das rapazas mentorizadas nas anteriores edicións: Xía Rodríguez e Alba Nogueira (A Riso), ambas as dúas tamén estudantes da ESAD de Vigo, que na cita terán ocasión de presentar as súas recentes creacións musicais.
Actuarán, ademais, cunha das grandes novidades deste ano: unha banda de apoio formada por músicas profesionais que acompañarán as mentorizadas nas súas actuacións. O mércores contarán co apoio de Ana Lucía, baixista de Agoraphobia; a guitarrista Laura Solla, a pianista Lidia Aldao e a batería Marina Acuña.
Ademais, no transcurso da gala proxectaranse vídeos nos que se presentarán a evolución e fitos acadados nas dúas anteriores edicións do programa, as novidades deste ano, o lanzamento da 3ª convocatoria de mentorías, as actividades que se celebrarán ao longo deste ano, a banda de apoio e unha xornada de networking con profesionais do sector.
Novidades
Alén da banda de apoio, Descúbreas “vén cargada de máis novidades nesta 3ª edición”, informou a institución provincial, engadindo que a axenda inclúe un Universo laboral, xornada de networking con empresas, profesionais e artistas do sector, e tamén promocionarase en feiras e foros a nivel estatal e internacional, crearanse vídeos-resumo en inglés para ampliar a sua proxección mundial e tamén incluirase un novo contido específico no seu boletín en liña semanas e nas redes sociais: Domingo con elas. Trátase dunha nova sección que cada domingo ofrecerá información sobre un contido musical ou transversal de artes e disciplinas como a escrita, o cine ou a fotografía, para dar a coñecer documentais, libros ou exposicións relacionadas con mulleres da industria musical.
O programa de mentoría é un dos eixos centrais de Descúbreas. Este ano serán de novo outras 8 nenas e mozas da provincia quen poderán iniciar os seus pasos profesionais na música, da man de mulleres referentes do sector en Galicia. As bases publicaranse esta semana no BOPPO e poderán solicitalas mulleres de entre 16 e 35 anos, ampliando a idade máxima de participación, que o ano pasado se establecía en 30 anos. Durante as sesións recibirán formación musical transversal, obradoiros e charlas impartidas por profesionais, e gravarán cadanseu tema e vídeo-clip que tamén serán lanzados nas principais plataformas de streaming e venda en liña.
Nesta edición de Descúbreas tamén se seguirán gravando vídeo-entrevistas a artistas sobre a situación das mulleres na música, vídeo-titoriais, distribuirase a newsletter semanal, ampliarase o directorio de mulleres profesionais, realizarase un novo vídeo colaborativo coas escolas de música da provincia (coas que se seguirán tecendo redes activas para construír un grupo activo inmerso na cultura feminista), prestarase o servizo de consultoría en liña para dar resposta ás inquedanzas das estudantes de música e, ademais, redeseñaranse e actualizaranse todos os contidos da plataforma web, na que tamén se difunden as principais novas e eventos de música en feminino.