A tenda de videoxogos GOG quere recuperar o seu espírito orixinal

A plataforma en liña GOG inicia unha nova etapa tras a adquisición por parte de Michał Kiciński, un dos fundadores de CD Projekt e impulsor da propia tenda dixital. O movemento marca un regreso ás raíces do proxecto: preservar xogos clásicos, garantir a súa accesibilidade e manter unha filosofía centrada na propiedade real por parte do usuario.
A compañía explica que o obxectivo desta operación é reforzar unha visión que consideran máis relevante ca nunca nun mercado dominado por ecosistemas pechados e clientes obrigatorios. Kiciński resume esa idea afirmando que GOG representa liberdade, independencia e control auténtico sobre o que se compra. A plataforma insiste en que continuará traballando para que os xogos do pasado non desaparezan por problemas de compatibilidade, perda de dereitos ou falta de mantemento.
No plano práctico, GOG garante que nada cambia para os usuarios: as bibliotecas persoais mantéñense intactas, os instaladores sen conexión seguirán dispoñibles e o cliente GOG Galaxy continuará a ser opcional. Tamén aseguran que os datos dos usuarios permanecerán dentro da compañía e que a relación con CD Projekt RED se mantén, polo que os títulos do estudio polaco seguirán chegando á tenda.
Outro punto clave é o programa de preservación. As doazóns dos patrocinadores e as contribucións destinadas a rescatar xogos clásicos permanecerán integramente na plataforma, que aspira a emprender proxectos máis ambiciosos en 2026 e 2027. A empresa tamén adianta que prepara novas iniciativas para dar máis voz á comunidade e reforzar o seu papel como espazo ético e non depredador para xogadores e desenvolvedores independentes.