A veciñanza de Covelo recibiu formación en Administración Electrónica

A veciñanza de Covelo recibiu formación no uso de ferramentas dixitais para relacionarse coas administracións a través da Rede. Profesionais do ámbito público impartiron no Auditorio Municipal, a través do programa A Administración preto ti, unha clase sobre os principais servizos prestados pola Subdelegación do Goberno en Pontevedra e os servizos electrónicos da Administración Xeral do Estado.
O Concello de Covelo puxo á disposición dos profesionais da administración todos os medios posibles para que a cidadanía recibise a formación do dito programa itinerante, que se desenvolve nas vilas de España para mellorar o coñecemento de ferramentas dixitais que facilitan a tramitación de determinados servizos sen ter que saír da casa.
Dun xeito sinxelo, abordouse como descargar a clave que nos vai dar acceso a información e trámites ou como facernos cun certificado dixital. Amais, explicáronse as medidas de seguridade de cada unha das plataformas, as principais características de cada unha delas, en que dispositivo electrónico e cando é axeitado utilizar unha ou outra e diversas consideracións e recomendacións para o seu emprego. Ademais facilitaron aos/ás asistentes a posibilidade de rexistrarse co sistema Cl@ve.
“A Administración Electrónica permite que as persoas que manexan dispositivos como un teléfono móbil ou un ordenador poidan xestionar citas, inscribirse en procesos, obter información, realizar consultas, coñecer o estado das súas solicitudes e moitas outras tarefas evitando desprazamentos”, destacou o Concello de Covelo ao fío desta xornada formativa, facendo fincapé na súa colaboración coas distintas administracións para “contribuír na alfabetización dixital e facilitar así o acceso á información e trámites electrónicos a un maior número de persoas o que supón un número menor de desprazamentos, un mellor manexo do tempo por parte das persoas, a contribución á redución de emisións de CO2, maior transparencia e mellor gobernanza, entre outros aspectos”.