AXEGA instalou o seu equipo de drons na Tecnópole ao abeiro das Aula Newton

No marco da celebración, este sábado 11, do Día Internacional da Muller e a Nena na Ciencia, a Axencia Galega de Emerxencias (AXEGA), a través do 112 Galicia, realizou este xoves 9 na Tecnópole de Ourense (Parque Tecnolóxico de Galicia) unha serie de actividades para o alumnado da Aula Newton. O director xeral de Emerxencias e Interior, Santiago Villanueva; e o xerente de Axega, Marcos Araújo, acudiron ao parque e acompañaron á rapazada nesta experiencia, ao tempo que responderon ás súas inquedanzas sobre o 112 e o día a día da Axencia.
Aula Newton
A Aula Newton Galicia é un espazo de aprendizaxe de Ciencias, Tecnoloxía, Enxeñaría e Matemáticas (STEM polas súas siglas en inglés) instalado no parque e destinado a promover as carreiras científicas e tecnolóxicas entre a mocidade “cun enfoque totalmente práctico e moi innovado”r. Nestas primeiras edicións céntrase en introducir á rapazada desde 2º da ESO a 1º de Bacharelato no mundo da aviación. Está impulsada conxuntamente pola multinacional Boeing, a organización sen ánimo de lucro FIRST Scandinavia, a Xunta de Galicia e Tecnópole.
112 Galicia
Pola súa parte, o 112 Galicia busca dar a coñecer este servizo ás novas xeracións de xeito ameno e próximo, a través da formación no eido da prevención e a auto-protección. A finalidade é que os máis novos teñan constancia de que existe este número de teléfono gratuíto, dispoñible as 24 horas do día e os 365 días do ano en todo o territorio da Unión Europea, e capaz de xestionar todo tipo de situacións de emerxencia (bombeiros, sanitarios, policía…).
A xornada
Durante a xornada os rapaces e rapazas participantes na Aula Newton tiveron a oportunidade de saber como funciona este servizo e aprenderon a empregalo correctamente e de maneira responsable, achegándose ademais a través dun vídeo ás instalacións públicas de Galicia onde se atenden este tipo de chamadas. Explicóuselles como actuar ante unha situación de perigo real, ao tempo que recibiron diverso material de protección.
Nas instalacións exteriores do Parque Tecnolóxico de Galicia emprazouse o posto de mando itinerante do equipo de drons da AXEGA. O alumnado puido deste xeito experimentar e coñecer mellor como se usan os vehículos aéreos non tripulados na procura de persoas desaparecidas ou no recoñecemento de espazos ou edificacións danadas, a través das súas cámaras térmicas. Este xoves puideron gozar desta experiencia rapaces e rapazas de 1º de Bacharelato dos Salesianos de Ourense.