Adeus ao rabudo Nacho Mirás

xoves, 15 de outubro do 2015 Marcus Fernández

JPEG - 184.9 KB
Nacho Mirás reivindicando o papel da Sanidade Pública ao recibir o seu premio na última edición de MexilOnseTuits

Esta tarde dixo adeus unha figura moi relevante no panorama galego da comunicación, xa que o xornalista e blogueiro Nacho Mirás Fole faleceu a consecuencia do cancro co que levaba anos loitando á vez que compartía os seus difíciles momentos cos seus seareiros a través de redes sociais, do seu blog, e incluso a través dun libro de grande éxito, El mejor peor momento de mi vida, que facía unha interesante achega á loita contra o cancro grazas á aguda perspectiva que sempre caracterizou a Mirás durante a súa carreira profesional.
Nacho Mirás demostrou ser un grandísimo comunicador, de xeito que cando iniciou o seu peor momento vital, en vez de recluírse, abriuse ao mundo a través da Rede, o que o ano pasado traduciuse en múltiples recoñecementos, entre os que podemos destacar o Premio 20blogs ao mellor blog persoal de 2013 e unha mención especial na última edición de MexilOnseTuits.
A loita de Mirás contra a enfermidade foi tamén unha reivindicación da Sanidade Pública, unha critica mordaz contra a burocracia e unha aproximación á parte máis humana das persoas, que levou a moitos a conectar co blogueiro máis rabudo, que sempre foi moi activo na Rede, chegando a ser todo un pioneiro en plataformas como Second Life, onde chegou a fundar un Centro Galego.
Perdemos así hoxe todo un referente do bo facer no mundo do xornalismo e na comunicación a través da Internet, que conseguiu deixar unha profunda pegada entre os seus milleiros de lectores e seareiros.

JPEG - 144.2 KB
Mirás sempre destacou polo seu compañeirismo, como podemos ver cando se retrata cos responsables de Vivir na Coruña
JPEG - 177.7 KB
Mirás sempre foi moi activo nas plataformas dixitais, con grande presenza en Twitter e Facebook, sendo un auténtico pioneiro en Second Life e no fenómeno dos blogs

PUBLICIDADE