Aerocamaras amosa as posibilidades profesionais dos drons ante estudantes de Lugo

venres, 13 de xaneiro do 2023 S. P.

A empresa galega Aerocamaras aproximou a realidade dos drons, as súas posibilidades e funcionalidades presentes e futuras, ao alumnado do IES Río Miño de Rábade (Lugo). Fíxoo este venres 13 de xaneiro pola mañá a través dunha xornada teórico-práctica de introdución aos vehículos aéreos non tripulados onde as e os estudantes puideron coñecer as aplicacións profesionais destes dispositivos e cuestións máis concretas como a aplicación dos mesmos en escenarios de emerxencia e seguridade. Participaron estudantes da ESO e de Bacharelato tecnolóxico do dito centro docente.
A xornada veu da man de Francisco Collantes, piloto de dron e responsábel de servizos profesionais con drons en Aerocamaras. Durante o encontro falou das características e funcionalidades dos UAV (acrónimo en inglés de Vehículos Aéreos non Tripulados) profesionais, así como dos sectores laborais nos que se está implantando e dos organismos públicos que actualmente traballan con estes dispositivos. Ademais o experto compartiu cos alumnos como estes aparellos e os programas informáticos que os controlan poden ser útiles en catástrofes e situacións de emerxencia tales como o recente accidente dun autobús que caeu ao río en Cerdedo-Cotobade. En concreto, explicouse aos alumnos como empregando esta tecnoloxía foi posíbel solicitar datos moi precisos para crear unha fotogrametría da zona onde tivo lugar o sinistro. “Isto”, explicou o formador, “permite recrear en 3D o accidente e a súa contorna e será clave para extraer conclusións periciais e esclarecer o fatídico suceso”.
Así mesmo expúxose o protocolo de actuación e intervención de drons en situacións de emerxencias e rescates, tanto terrestres como acuáticos: mediante voo de UAV con cámara térmica identificar se hai vítimas e en que situación están; asistir con dispositivo aéreo de carga se fose necesario e identificar as coordenadas para que os equipos terrestres teñan a localización e conciencia da situación con vistas a que poidan acceder co equipamento necesario; inspeccionar a contorna; efectuar o levantamento tridimensional da escena e do sinistro; e, por último levar a cabo a reconstrución do accidente en 3D para reproducir as condicións nas que se produciu.
Ao final do coloquio o alumnado mostrou interese pola profesión de piloto de dron como saída profesional e dos requisitos necesarios para dedicarse a este ámbito profesional. A xornada terminou cunha demostración do manexo de drons especialmente dirixidos para voos profesionais.

PUBLICIDADE