Alcatel-Lucent porá na rúa a 12.500 traballadores, 3.500 máis dos que dixo nun principio

As crises das empresas chegan en ocasións por motivos alleos ó estado do mercado, ou polo menos ese parece ser o caso de Alcatel-Lucent, fabricante de equipos de telecomunicacións que semella estarse afundindo xusto agora nestes tempos en que a telefonía tenos sorbidos os miolos ós consumidores, que non somos persoas en sociedade se non cambiamos de móbil en cada data sinalada. Ironías aparte, o caso de Alcatel-Lucent é especialmente dramático, posto que xa anunciou que vai deixar na rúa a 12.500 empregados nos vindeiros tres anos, 3.500 máis dos que anunciara previamente na prensa.
Ademais, a empresa declarou perdas netas de 618 millóns de euros nos tres primeiros meses no cuarto trimestre de 2006, cifra que contrasta sobre maneira cos 318 millóns de euros recadados no mesmo período de 2005. Cómpre lembrar que este xigante ferido da tecnoloxía que é Alcatel-Lucent viña constituíndo ata o de agora o segundo maior provedor de equipos móbiles e para redes de telecomunicacións. Coa medida de despido masivo de traballadores agarda aforros de máis de 1.400 millóns de euros.