Altia e Gradiant recuncan no Foro Tecnolóxico de Emprego
xoves, 14 de marzo do 2019
Estes
días, até mañá, celébrase na Universidade de Vigo, de man do
alumnado das súas escolas de enxeñaría, a
edición dezanove do seu Foro Tecnolóxico de Emprego, unha cita
referencial para fixar contactos entre as empresas da nosa contorna e
a canteira galega de vindeiros profesionais. A cita desenvólvese en
Minas, Industrias e Telecomunicación, e inclúe no seu programa
conferencias, obradoiros, demostracións e mesas redondas, amais de
casetas informativas das firmas participantes. Entre as entidades e
empresas que están a ter parte activa no foro (arredor de medio
cento) atópanse dúas vellas coñecidas do evento: Altia
e o Centro
Tecnolóxico Gradiant.
O
centro tecnolóxico, que conta con emprazamento propio, comparte no
foro os obxectivos dos restantes participantes: acode na procura de
novos talentos. Segundo fai saber Leticia Torrejón, responsábel de
Selección e Xestión do Talento en Gradiant, “o foro é unha cita obrigada para nós en canto a captación e selección de
talento. Cada ano acudimos para coñecer ás novas xeracións de
enxeñeiros e enxeñeiras da Universidade de Vigo, que sempre
formaron parte do expertise do noso centro”. Ademais,
Torrejón indica que “este ano a participación de Gradiant será
diferente, co obxectivo de animar aos alumnos a demostrar de que son
capaces con diferentes actividades e conferencias”.
Entre
esas actividades innovadoras que comenta Torrejón atópase Capture
the Flag, unha serie de 4 retos informáticos para que o alumnado
demostre as súas habilidades e destreza á hora de resolver
problemas relacionados coa programación, redes de computadores e
seguridade informática.
Amais,
Gradiant tamén terá presenza nunha mesa redonda xunto ás compañías
Televés, Optare e Quobis. Por outra banda, o centro tecnolóxico TIC
formará parte das empresas participantes no Speed Recruiting,
unha serie de citas rápidas onde os alumnos terán dous minutos para
convencer ás empresas de que son os candidatos perfectos para formar
parte dos seus respectivos equipos. O Speed Recruiting
celebrarase este xoves 14 ás 13:00 horas na E.E. de Industriais.
Polo
que respecta a Altia, forma parte das fileiras do sector empresarial
que acode á cita na procura de talento. Segundo fai saber Roberto
Pérez, xefe de proxectos da empresa Altia, unha das firmas clásicas
deste foro, “cada vez a participación é maior, tanto entre as
empresas como entre o alumnado”. E engade: “Acudimos a este
evento dende hai anos e seguirémolo facendo, a día de hoxe non se
entendería non estar”, recalca Pérez, que fai fincapé en que “o
alumnado sae ben formado, pero, por suposto logo necesitan un tempo
para adaptarse e coller a dinámica da aprendizaxe continua”.