Ampliado o prazo para participar no certame de innovación da USC

En tempo de crise e de despidos dos que xa hai tempo que perdimos a conta, se cadra unha das saídas posibles sexa a máis impensable de todas: pór en marcha unha empresa propia. A tarefa, sen ser doada, ten unha parte do camiño feito se, en contra do que sería o máis normal, inspirarnos directamente en algo que xa está feito e no mercado, imos ao extremo contrario, a innovación. Para a Universidade de Santiago, o intre que vivimos é o axeitado para botar man deste espírito emprendedor e de todos os recursos que lle dan azos, dende as ferramentas de comunicación e xestión de datos que achegan as TICs ata convocatorias como a que desenvolve a propia USC para promover o “faino ti mesmo”, o Concurso de Proxectos Empresariais Innovadores.
O certame, que vai pola súa décima achega, vén de ser obxecto dunha ampliación no prazo de presentación de iniciativas (memoria descritiva dunha empresa), que se estende ata o 15 de marzo.
A convocatoria, informa a USC, abrangue un primeiro premio de 7.000 euros e ata outros 24.000 de préstamos participativo a cargo de Unirisco Galicia SRC e un segundo de 4.000 euros. Ademais disto, fixáronse outras catro categorías que recibirán 2.000 euros cadansúa por iniciativas de Empresa Xove, Muller Emprendedora, Proxecto Medioambiental e Proxecto con Sensibilidade Social.
O obxectivo da iniciativa é impulsar a creación de empresas innovadoras promovidas por estudantes, licenciados ou investigadores, así como a innovación empresarial e a xeración de emprego. Deste xeito, di a USC, a convocatoria está aberta a estudantes e titulados de calquera das tres universidades galegas e de centros asociados da UNED en Galicia con independencia da área de coñecemento que individualmente ou en equipo teñan un proxecto empresarial innovador con potencialidade para converterse nunha empresa. Tamén poderán concorrer doutores, doutorandos, persoal de investigación e alumnos de terceiro ciclo que traballen en calquera centro de investigación galego, así como empresas xa constituídas ao longo do ano 2009 por promotores co perfil descrito.