Apple podería lanzar unha tableta orientada á domótica

O Google Nest Hub é unha das pantallas conectadas que hai dispoñibles no mercado actualmente

Nos últimos anos puidemos ver propostas de distintos fabricantes para empregar pantallas conectadas como un xeito de relacionarse coa domótica e os asistentes virtuais, como os Nest Hub de Google, ou os Echo Show de Amazon (que incluso teñen unha versión con pantalla de 10 polgadas que rota para seguir ao usuario), e o analista Mark Gurman asegura dende Bloomberg que Apple vai ir polo mesmo camiño.
Aseguran que preto do mes de marzo podería ver a luz un dispositivo co nome en clave J490 que serviría para controlar os dispositivos do fogar, realizar videoconferencias e tirar proveito das posibilidades de Apple Intelligence. Este modelo básico tería unha pantalla cadrada de 6 polgadas, polo que tería unhas dimensións semellantes a colocar dous iPhone pegados, contando con cámara frontal, altofalantes internos e batería recargable, ou sexa, que sería moi semellante a un iPad, pero orientado a usos específicos.
Gurman tamén comenta a posibilidade de que, na liña do Echo Show 10, exista unha versión de alta gama, cun prezo próximo ao milleiro de dólares, que tamén tería tecnoloxía de seguimento do usuario.
Aseguran que o novo dispositivo podería fixarse na parede, aínda que tamén venderían bases con altofalantes adicionais pensando na súa colocación en cociñas, dormitorios e escritorios, buscando facilitar a realización de videoconferencias en mans libres.
Outra das funcións que resultarían atractivas deste tipo de dispositivos sería a visualización de cámaras de seguridade e de videoporteiros, que en moitos escenarios será o que leve aos consumidores (se están afeitos ao ecosistema de Apple) a subir ao carro deste tipo de trebellos.