Aprobado na Coruña o proxecto de ordenanza reguladora da eAdministración

A xunta de Goberno local da Coruña deu luz verde ao proxecto da Ordenanza Reguladora da Administración Dixital, unha iniciativa orientada a mellorar os servizos ofrecidos á cidadanía, ás empresas e ás demais institucións públicas e privadas desde a Administración municipal. Segundo explicou o concelleiro de Economía e Facenda, José Manuel Lage, o proxecto responde ao reto de “adaptar a nosa ordenanza e a nosa organización aos novos tempos, mellorando os servizos ofrecidos á cidadanía, ás empresas e ás institucións públicas”.
Entre outras cousas, inclúese no marco regulamentario a implantación dunha rede de apoio á Administración Electrónica que propón dous tipos de oficinas de atención presencial: unha, de atención cidadá, que asuma as funcións das oficinas de asistencia en materia de rexistro, co obxectivo de “axudar a todas aquelas persoas que precisen de asistencia no manexo dos medios dixitais e o uso da sinatura electrónica, entre outros aspectos”; e, ademais, puntos especializados de apoio para a realización de trámites en determinadas materias, como no caso das actuacións e xestións urbanísticas.
Por outra banda, a creación do arquivo dixital único suporá o almacenamento por medios electrónicos, un proceso seguro e confidencial, dos documentos administrativos que se xeren en procesos desta tipoloxía, así como a correcta xestión e conservación dos mesmos a longo prazo.
Lage engadiu que a ampliación e actualización de servizos da sede electrónica, o rexistro electrónico, o taboleiro de edictos electrónico e demais sistemas e instrumentos do Concello implantaranse e entrarán en funcionamento nun prazo non superior a dous anos.